Në fund të një sezoni katastrofik, Arsenali dhe Arsene Wenger dolën faqebardhë në finalen e FA Cup-it, duke marrë frymë më në fund lehtësisht.
Fitorja në derbin londinez, për më tepër, erdhi në saje të një loje të mirë, mbase pas paraqitjes më të mirë sezonale.
“Topçinjtë” fituan 2-1, e kështu u bënë ekipi që e ka shtënë në duar më shumë se çdo skuadër tjetër këtë trofe: plot 13 herë!
Rekord më vete dhe ai i Arsene Wenger-it, trajnerit më të suksesshëm në FA Cup, me shtatë trofe të fituar.
Ndeshja në “Wembley” do të niste mjaft mirë për Arsenalin, që e pa veten në epërsi që në minutën e 5-të, kur shënoi Alexis Sanchez. Rezultati mund të ishte dyfishuar, ngase Arsenali do ta dominonte pjesën e parë, por shtyllat e portës kundërshtare ndaluan përpjekjet e sulmuesve.
Çelsi mbeti me dhjetë lojtarë pas daljes me karton të kuq të Moses në minutën e 68-të, e megjithatë Diego Costa barazoi shifrat tetë minuta më pas.
Një barazim që nuk zgjati shumë, ndërsa Ramsey shënoi në minutën e 79-të. Rezultati nuk do të ndryshonte gjer në fund, me lojën të mbyllur 2-1 për Arsenalin.
“Jam krenar që kam fituar shtatë nga këto kupa,” deklaroi Wenger pas finales. Sa për të ardhmen e tij, përgjigjja e francezit qe kjo: “Kemi një takim të bordit të martën. E të mërkurën apo të enjten do të jetë më e qartë.” /tesheshi.com/
