Arsenali dhe Bazeli do të takohen sonte në “Emirates Stadium”, në kuadër të javës së dytë të fazës në grupe në Champions League.
Për dy prej protagonistëve do të jetë një përballje e veçantë. Vëllezërit Xhaka, Graniti e Taulanti, do të vihen edhe njëherë kundër njëri-tjetrit, ashtu siç bënë në Euro 2016.
Veç kësaj, për Granit Xhakën do të jetë dhe një ribashkim me skuadrën ku ai u formua si futbollist. Graniti do të largohej nga Bazeli në vitin 2012, për të kaluar në radhët e gjermanëve të Borusia Mynshegladbahut. Këtë verë ai u bë pjesë e Arsenalit, i ndjekur nga Venger prej kohësh.
Disa orë para takimit të kësaj mbrëmjeje, Granit Xhaka ka shkruar këto rreshta në llogarinë e tij në instagram:
“Fëmijëri dhe vëllazëri! Kurrë e ëndërruar, por është njëmend e vërtetë. Unë u rrita në Bazel dhe luajta atje për herë të parë. Tani kthehem të luaj kundër vëllait tim! Emocione të mëdha dhe dashuri si për njërin dhe tjetrin!” /tesheshi.com/
