Banorët e lagjes ‘Kroi i Vitakut’ kanë arritur një marrëveshje me institucionet e Kosovës për rindërtimin e shtëpive të shkatërruara gjatë luftës në Kosovë. Por kjo marrëveshje e arritur, i ka ndarë banorët shqiptarë të lagjes më dysh, e sidomos ata që ende nuk i kanë ndërtuar shtëpitë, duke thënë se ajo nuk do të realizohet.
“Unë e kam kundërshtuar këtë marrëveshje dhe kemi qenë kundër me disa fqinjë të mij, kryesisht me ata që nuk i kanë shtëpitë të ndërtuara, por me shumicë të votave, na mundën dhe arritën këtë marrëveshje”, ka thënë përfaqësuesi i lagjes ‘Kroi i Vitakut’, Nazmi Ismaili.
Sipas tij, në marrëveshje thuhet se është formuar një grup ministror ku do të jenë prezent edhe përfaqësuesit e shqiptarëve dhe serbëve të lagjes dhe do të bisedojnë për rindërtimin e shtëpive.
“Dhe duke pas parasysh lojërat që na kanë bërë serbët deri më tani, kjo marrëveshje nuk besoj se do të realizohet dhe nuk do të ketë as rindërtim të shtëpive e as kthim të shqiptarëve në veri”, ka thënë Ismajli. Sipas tij, “me këto obstruksione të serbëve ne jemi mësuar dhe për këtë arsye kësaj marrëveshje nuk i besojmë”.
Dalibor Jevtiq, ministër për Komunitete dhe Kthim, pas takimit ka theksuar se “sot kemi arritur një marrëveshje të mirë ku do të jenë të përfshirë qeveria e Kosovës me Ministrinë për Kthim, dy kryetarët e komunave dhe përfaqësuesit e lagjes. Besoj se pas punës që do të filloj ky komision ndërministror edhe në veri të Mitrovicës, do të kemi kthim të qëndrueshëm”, ka thënë ministri Jevtiq.
I këtij mendimi ka qenë edhe kryetar i Komunës së Mitrovicës jugore, Agim Bahtiri.
Bahtiri ka theksuar se “kemi formuar një grup ndër ministror ku do të jenë edhe përfaqësuesit e shqiptarëve dhe serbëve, e ku do bëhet kthimi i të gjithë qytetarëve në shtëpitë e tyre”.
“Kjo është punë e shkëlqyer dhe lagja ‘Kroi I Vitakut’, më nuk do të jetë në faqet e para të medieve. ‘Marrëveshja që kemi arritur po shpresoj që është e mirë dhe do të realizohet qindpërqind pasi që këtu janë të kyçur të gjithë, qeveria e Kosovës, pra Kryeministri, dy ministra, dy kryetarët e Mitrovicës, si dhe përfaqësuesit e lagjes shqiptarë dhe serbë”, ka thënë Bahtiri.
Takim është mbajtur në shkollën e fshatit Suhodoll me dyer të mbyllura në mes banorëve shqiptarë të “Kroit të Vitakut” dhe dy ministrave të qeverisë së Kosovës, Dalibor Jevtiq, ministër për Komunitete dhe Kthim dhe Ljubomir Mariq, ministër i Pushtetit Lokal dhe dy kryetarëve – Goran Rakiq, kryetar i Mitrovicës së Veriut dhe Agim Bahtiri, kryetar i Mitrovicës së Jugut.
Në takim nuk kanë qenë përfaqësuesit serb të lagjes ‘Kroi i Vitakut’, pasi që siç ka raportuar portali ‘Tesheshi’, dy ministrat kosovar serb Jetviq e Mariq, janë takuar me serbët dite më parë. /tesheshi.com/
