.
Ndërsa është ndaluar nga Policia Sllovene në Aeroporti i Lubljanës sipas një mandate të lëshuar nga Beogradi që në vitin 2006, kreu i AAK’së Ramush Haradinaj i ka akuzuar zyrtarët sllovenë se janë sjellë njësoj si Serbia.
Në një bisedë telefonike me Kosovapress, kreu i AAK tha: “Në të gjitha aeroportet është pastruar ky fletëarrest, ndërsa vetëm në këtë të Lubjanës jo. Gjatë udhëtimit tim, kam kaluar nëpër disa aeroporte dhe në të gjithë është pastruar kjo histori. Po këta janë si ata, vëllezërit e tyre”, tha Haradinaj.
15.20
Kreu i AAK-së do të qëndrojë në aeroportin e Lubjanës edhe për disa orë, deri sa të përfundojnë të gjitha procedurat. Ai, tha se tashmë ka humbur avionin dhe po pret një tjetër avion për t’u kthyer shpejt në Prishtinë.
Ramush Haradinaj ndodhet aktualisht në një sallë të policisë sllovene në pritje të lirimit dhe kthimit në atdhe.
Burime të Ministrisë së Jashtme të Kosovës bëjnë me dije se pas ndalimit të kreut të AAK nga policia sllovene kanë nisur menjëherë kontaktet për të ndalur këtë ndalim absurd.
Haradinaj po kthehej në Kosovë nga Berlini ku ndodhej për vizitë zyrtare dhe kishte marrë tranzitin në aeroportin e Lubljanës, ku është ndaluar nga policia.
Në sistemin e të dhënave të policisë sllovene ndodhej një kërkesë e vitit 2006 e policisë serbe që kërkonte arrest ndaj Ramush Haradinajt. Çështja po sqarohet në këto momente. Në fakt nuk është hera e parë kur drejtues të Kosovës, kryesisht ish komandantë të UÇK-së ndalohen në Slloveni pas kërkesave të Serbisë.
Një gjë e tillë ka ndodhur në të kaluarën me Zv.kryeministrin Hashim Thaçi, ministrin Agim Çeku dhe të tjerë.
Ramush haradinaj është arrestuar dy herë nga Gjykata e Hagës i akuzuar për krime lufte dhe të dyja herët është shpallur i pafajshëm.
Ndalimin e zotit Haradinaj e ka lajmëruar partia që drejton ai, Aleanca për Ardhmërinë e Kosovës.
14.40
Aleanca për Ardhmërinë e Kosovës njoftoi se lideri i tyre, Ramush Haradinaj është ndaluar në Aeroportin e Lubjanës, Slloveni në bazë të një fletë arresti të lëshuar nga Policia e Serbisë në vitin 2006.
AAK bën të ditur se në rrugë gjatë kthimit pas vizitës zyrtare në Berlin, kryetari i Aleancës për Ardhmërinë e Kosovës, Ramush Haradinaj, është ndaluar ne Aeroportin e Lubjanës, në Slloveni, në bazë të një fletarrestimi të lëshuar nga Policia e Serbisë, në vitin 2006.
“Aleanca për Ardhmërinë e Kosovës e konsideron këtë një veprim ndërhyrje me qëllime të njëjta dhe identike si të policisë serbe, ndaj z.Ramush Haradinaj, ish-kryeministër i Kosovës dhe udhëheqës i njohur i luftës për lirinë e Kosovës”, bëhet e ditur.
AAK kërkon veprim të menjëhershëm për lejimin e Haradinajt në udhëtimin e tij drejt Prishtinës, dhe e konsideron këtë ndalim tendencë të qëllimshme ndaj personalitetit dhe gjithë asaj që përfaqëson, Haradinaj.
“Fletarrestet serbe, njollosjet dhe sulmet ndaj Haradinaj jane zhvleftësuar dhe demantuar disa herë dhe në forma të ndryshme”, theksohet në komunikatën e AAK-së-
/tesheshi.com/
