Policia e Shtetit arrestoi sot në Shijak, shtetasin Rudin Çalliku, i shpallur në kërkim ndërkombëtar nga Interpol Roma. Ndalimi i këtij shtetasi u bë me qëllim ekstradimin drejt Italisë, pasi Gjykata e Venezia e ka dënuar me 5 vjet, 6 muaj dhe 15 ditë burg, për veprën penale “shfrytëzim prostitucioni” parashikuar në neni 3.4,575 dhe ligjit Nr.75, datë 20.02.1958 të Kodit Penal italian.
Mbi 44-vjeçarin, që është një emër i njohur për drejtësinë italiane, rëndojnë një sërë akuzash si armëmbajtje pa leje, vjedhje, shfrytëzim prostitucioni, trafik droge, vrasje në tentative si dhe krimet kundër pasurisë dhe skllavërim dhe dhunë seksuale, raporton tv klan.
Rudin Çalliku për herë të parë u arrestua në vitin 1994 në moshën 21 vjeçare, pasi akuzohej për vjedhje.
Ai u arrestua në vitin 2001 nga policia e Trevisos. Më vonë Çalliku, nis aktivitetin në trafikun e drogës duke u bërë kështu një person i rrezikshëm për shtetin italian.
Ai zhduket nga radarët e hetuesve të Vicencës dhe nga drejtësia italiane për disa vite, ndërsa kthehet në Shqipëri dhe më pas arrestohet në 30 Janar 2014 nga policia e Shijakut, pasi ishte shpallur në kërkim nga Interpol Tirana në 26 qershor të vitit 2012.
Çalliku kërkohej nga autoritetet italiane të drejtësisë, pasi gjykata e Genovas kishte nisur hetimet ndaj tij që në vitin 2002 për veprat penale të trafikut të drogës, tentativës së vrasjes dhe pjesëmarrjes në organizata kriminale. /tesheshi.com/
