Eshtë shënuar rasti “Tire nr.2”, kësaj here në COVID 1, te Infektivi ku drejton dr. Najada Çomo, dhe deri diku më i rëndë se ai i Tire Alldervishit te COVID 2 – spitali “Shefqet Ndroqi”, ku sanitarja Tire, duke u hequr si infermiere, zhvaste një qytetare e cila kishte nënën nën kurim nga Corona, e cila më pas dhe ndërroi jetë. Por miliona lekë përfunduan në xhepat e sanitares mashtruese dhe zhvatëse.
Ndërsa te Infektivi, “shoqja” e Tires, e quajtur Ronida Hysa, 30 vjeç dhe banuese në Durrës, ka shkuar deri aty sa ka marrë paratë nga xhepi i një të sapohumburi jetë nga Corona.
Edhe ky rast i denoncuar nga i biri i të ndjerit në emisionet investigative tyë mbrëmjes.
Policia që ka ndaluar infermieren 30-vjeçare, thotë në komunikatën e saj:
“Ndalimi i kësaj shtetaseje u bë pasi në bazë të pamjeve filmike rezulton si autorja e vjedhjes së një shume parash në portofolin e shtetasit K. D., i cili ka qenë i shtruar në spitalin infektiv, ku ka ndërruar jetë nga COVID-19.
Pas kallëzimit të bërë për këtë ngjarje, nga djali i të ndjerit, shtetasi F. D., 25 vjeç, i cili ka deklaruar se nga llogaria bankare e të atit ishte tërhequr shuma 60.000 lekë, specialistët për Hetimin e Krimit në Komisariatin e Policisë kanë organizuar punën për identifikimin e autorit (autores)”, njofton policia.
Siç raportohet, i ndjeri i grabitu iu shtrua në spital më 22 dhjetor 2020 dhe humbi jetën më 27 dhjetor 2020. Djali thotë se para se të shtronte të atin në spital, i kishte dhënë portofolin me 202 mijë lekë të vjetra, brenda së cilës ndodhej edhe karta e bankomatit së bashku me kodin pin. Por dy ditë përpara se babai të humbiste jetën, denoncuesi tregon se nga bankomati ishin tërhequr para me kartën e bankës që kishte lënë në portofolin e të atit.
Bëhet fjalë për datën 25 dhjetor, kohë që përkon me ditën kur babai i denoncuesit ishte futur në intubim pasi gjendja e tij shëndetësore ishte përkeqësuar, shkruan Shqiptarja.com.
Dy ditë pas këtij veprimi, më 27 dhjetor babai i tij ndërroi jetë dhe punonjësit e spitalit i kthyen denoncuesit sendet personale të babait.
Por aty ai vuri re se brenda portofolit mungonin 200 mijë lekë të vjetra, pasi kishin mbetur vetëm 2 mijë lekë të vjetra. Edhe karta e bankës së bashku me shënimin për kodin pin mungonte. Djali thotë se ka vënë në dijeni edhe infermieren, me të cilën fliste për shëndetin e të atit, por ajo ka refuzuar ta denoncojë këtë akt, duke rezultuar më vonë që të ketë qenë vetë ajo autore e zhvatjes së të ndjerit. /tesheshi.com/
