Partia Demokratike është “ndjerë mirë” pas konfirmimit të faktit se dy kuadro të lartë policie të arrestuar së fundi, Haki Hasanbegaj, shef i rendit në Drejtorinë e policisë së Vlorës dhe Gani Abazi, shef i specialistëve të zonave në Komisariatin e Tepelenës, kanë qenë të lidhur me trafikun e drogës. Kjo pasi opozita nuk ka rreshtur së akuzuari ministrin Tahiri që në krye të Rendit ka emëruar njerëz të lidhur me trafikun e kanabisit.
“Ndalimi i dy drejtuesve të lartë të policisë në Vlorë dhe në Tepelenë, me urdhër të Prokurorisë, si të lidhur me kultivimin e trafikimin e drogës, është dëshmia më e fortë e kriminalizimit të shtetit, e vënies së shefave të policisë së Saimir Tahirit dhe Edi Ramës në krye të biznesit të hashashit, për përfshirjen e njerëzve të Tahirit në trafikun e drogës, për haraçin që ata marrin nga ky biznes kriminal, deri në 40 përqind për një rrënjë”, tha gjatë një deklarate për shtyp Enkelejd Alibeaj, Sekretar i Departamentit të Rendit dhe Sigurisë në PD.
Ndërkohë, nga ana e ministrit të Rendit nuk ka asnjë reagim. Tahiri ishte sot në jug të vendit, në Gjirokastër, në kuadër të fushatës “Shqipëria pa armë”. Sipas tij, deri më tani 500 shqiptarë kanë dorëzuar armët. /tesheshi.com/
