Arrestimet masive në portin e Durrësit dhe në pikat e kalimit kufitar të doganierëve që kishin lejuar kalimine 10 tonë drogëve drejt Italisë, u cilësuan nga kreu i Opozitës, Lulzim Basha si provë se trafikun e drogës e bën shteti.
Basha përgëzoi aksionin e prokurorisë dhe kërkoi nga ajo të çojë deri në fund hetimet duke i vënë prangat ish-ministrit të Brendshëm, Saimir Tahiri dhe duke e mbyllur me atë që e quan kreu i bandës dhe që i referohet kryeministrit Edi Rama.
“Banda, çeta, kupola e republikës së vjetër, e komplotit kundër shqiptarëve, 10 – 15 vetë janë në total. Kontrollojnë ekonominë e shqiptarëve, taksat, asetet. Kontrollojnë politikën në shërbim të këtyre hajdutëve, dhe kriminelët që kontrollojnë aktivitetin kriminal, drogën. E kam fjalën për Edi Ramën dhe Saimir Tahirin me shokë që e mbushën Shqipërinë me drogë si pjesë e komplotit të tyre kundër lirive dhe mirëqënies së qytetarëve shqiptarë”, tha Basha.
Basha akuzoi Ramën se me vettingun kërcënon ata që duan të vënë para drejtësisë të korruptuarit. “Sigurisht që këto nuk i bëjnë dot se u rri vettingu mbi kokë. Se vettingu i Ramës për këtë punë është bërë jo të çlirojë drejtësinë nga korrupsioni, por që të ruajë çetat e kriminelëve dhe të korruptuarve duke kërcënuar këdo që guxon të hetojë e çojë para përgjegjësisë penale të korruptuarit në këtë vend”, tha Basha. /tesheshi.com/
