Armiqtë e komunistëve, një kërkesë socialistëve

Të përndjekur politikë i kërkojnë të majtës në pushtet atë që ata e quajnë “Parcelë Kombëtare të Kujtesës për të Zhdukurit gjatë regjimit komunist”.

Një përfaqësi e tyre nga Unioni Mbarëkombëtar i Integrimit të Burgosurve dhe të Përndjekurve Politikë të Shqipërisë, ishte te zyra e kryeparlamentares Lindita Nikolli për ta paraqitur si kërkesë.

Kjo e fundit, duke thënë se do ia përcillte instancave të tjera shtetërore, vlerësoi idenë e atyre që, për arsye trashëgimore, s’para e duan partinë e saj.

“Kjo nismë jo vetëm qetëson shpirtrat e të zhdukurve gjatë regjimit komunist dhe familjet e pasardhësit e tyre, por është edhe një thirrje pajtuese për shoqërinë, për t’iu larguar frymës së urrejtjes dhe për të ecur përpara, për ndërtimin e një shoqërie të drejtë, humane dhe solidare”, tha Nikolli, e cila dhe pozoi me ish-të përndjekurit e djeshëm nën komunizëm. /tesheshi.com/