Liderët e Iranit u shprehën skeptikë ditën e shtunë në lidhje me qëndrimin e Shteteve të Bashkuara të Amerikës, për të arritur një marrëveshje të përbashkët për armët bërthamore, pavarësisht se Uashingtoni dhe aleatët e tij folën për një progres real dhe një nevojë urgjente që Teherani të marrë një vendim të vështirë.
Edhe pse kanë ngelur vetëm 10 ditë nga fundi i muajit Mars, i cili shënon afatin përfundimtar për të arritur një marrëveshje, lideri i Iranit, Ayatollah Ali Khamenei denoncoi “ngacmimin” e SHBA për negociata dhe përsëriti edhe një herë mohimin e Teheranit për të zhvilluar armët bërthamore.
Pas javëve të tëra bisedimesh me Iranin në Zvicër, Sekretari i Shtetit, John Kerry fluturoi për në Londër, ku u takuar me homologët e tij nga Britania, Franca dhe Gjermania, në mënyrë që të gjejnë një zgjidhje për këtë problem, i cili kërcënon për hapjen e një lufte të re në Lindjen e Mesme.
Në një deklaratë të përbashkët, ministrat e jashtëm bënë me dije se ishte bërë një “progres substancial” me Iranin në disa aspekte kyçe, por shumë të tjera kishin ngelur të pazgjidhura.
“Tani është momenti që Irani të marrë vendimet e vështira”,- kanë thënë ata.
Së bashku me Kinën dhe Rusinë, të katërt vendet janë duke u përpjekur për të arritur një marrëveshje me Teheranin, për kufizimin e e ndjeshëm të disa aspekteve të programit atomik të Iranit, në këmbim të lehtësimit të sanksioneve ndërkombëtare.
Aleati i SHBA-ve, Izraeli, i konsideron aktivitetet bërthamore të Iranit si një kërcënim ekzistencial, pavarësisht mohimeve të fuqishme të Teheranit.
Presidenti i Amerikës, Barack Obama tha në një intervistë se Irani nuk ka plotësuar ende kushtet e nevojshme për të cilësuar marrëveshjen si të kompletuar./tesheshi.com/
