Qeveria argjentinase ka publikuar një arkiv dixhital të aktiviteteve të nazistëve që ikën në vend pas Luftës së Dytë Botërore.
Arkivi dixhital përfshin dokumente rreth kriminelëve famëkeq si Josef Mengele dhe Adolf Eichmann. Këto janë më shumë se 1,850 dokumente që ishin të disponueshme vetëm në formë të shtypur në Arkivat Kombëtare të Argjentinës që nga viti 1992, por tani janë postuar në internet dhe kushdo mund t’u qaset atyre, falë “përpjekjeve të gjera për restaurim dhe dixhitalizim”, siç njoftoi Ministria e Brendshme argjentinase.
Dokumentet rreth Kolonelit të SS-ve, Eichmann, i cili ishte përgjegjës për transportimin e miliona hebrenjve në kampet e shfarosjes, tani janë në dispozicion të çdo përdoruesi të internetit. Pas Luftës së Dytë Botërore, “arkitekti” i Holokaustit iku në Argjentinë ku agjentët izraelitë e kapën dhe e transferuan në Izrael në maj të vitit 1960. Adolf Eichmann u gjykua për krime kundër njerëzimit dhe dy vjet më vonë u var.
Mengele ishte mjek në kampet naziste të përqendrimit, i njohur për “eksperimentet” e tij të tmerrshme dhe u mbajt në histori si “engjëlli i vdekjeve të Aushvicit”. Ai fillimisht iku në Argjentinë dhe më pas në Brazil, ku dha frymën e fundit në vitin 1979. /tesheshi.com/
