Barcelona ka fituar Superkupën e Spanjës, duke e mposhtur dhe në takimin e dytë Seviljen. Pas një fitoreje 0-2 tre ditë më parë në transfertë, ka ardhur dhe suksesi 3-0 në “Camp Nou”.
Në prani të 71.803 shikuesve, futbollistët katalanas kanë dhënë spektakël, për ta nisur sezonin aty ku e lanë vitin e shkuar, duke fituar trofe.
Luis Enrique hodhi në fushë mbrëmjen e së mërkurës një treshe sulmuese të përbërë nga Messi, Arda Turan e Munir, me Luis Suarez-in të lënë në stol përgjatë gjithë lojës.
Një vendim që iu shpërblye trajnerit spanjoll me një paraqitje të jashtëzakonshme të turkut Arda Turan, i cili qe dhe lojtari më i mirë i ndeshjes. I mbërthyer nga kritikat e panumërta, përpos një vere të vështirë për shkak të paraqitjes së dobët me përfaqësuesen turke në Europian, Arda Turan është kthyer në një prej lojtarëve më spikatës të Barcelonës në këtë pragsezoni. Edhe pse është folur për një largim të tij nga Barcelona, qëndrimi është thuajse i sigurt, aq më tepër pas këtyre paraqitjeve.
Arda Turan shënoi dy gola në fitoren e mbrëmshme 3-0. Të parin në minutën e 10-të, pas një kombinimi me Messi-n, e të dytin në minutën e 46-të, me një gjuajtje fantastike nga jashtë zonës.
Golin e tretë do ta shënonte Messi në minutën e 55-të. Duhet veçuar gjithashtu paraqitja e portierit Claudio Bravo, i cili priti një 11-metërsh në minutën e 32-të. Kiliani është drejt largimit nga Barcelona, për t’iu bashkuar Mançester Sitit në kampionatin anglez; një veprim që duket i nxituar nga ana e katalanasve, duke patur parasysh atë çka tregoi ai në fushë.
Barcelona i është kthyer fitimit të Superkupës pas tre vitesh, teksa e fitonte atë për herë të fundit në 2013-tën. /tesheshi.com/
https://youtu.be/qfQN0HvowLc
