Një incident në fluturimin pas miqësores me Maqedoninë të luajtur të hënën i ka kushtuar karrierën ndërkombëtare futbollistit të Barcelonës dhe të kombëtares turke.
Arda Turan ka sulmuar një gazetar turk në avionin që do i dërgonte në Trieste, në vijim të përgatitjeve për ndeshjen me Kosovën më 11 qershor.
Sulmi i lojtarit erdhi pas komenteve të mëhershme të gazetarit në lidhje me Europianin e vitit të shkuar, teksa Arda Turan qe akuzuar për përplasje me drejtuesit për shpërblimet për pjesëmarrjen në atë veprimtari.
Pas incidentit të mbrëmshëm, Federata Turke e Futbollit dhe trajneri Fatih Terim vendosën për përjashtimin e lojtarit nga grumbullimi.
Kapiteni i përfaqësueses turke ka mbajtur sot një konferencë shtypi me këtë rast, ku ka lajmëruar largimin nga aktiviteti ndërkombëtar.
“Jam i penduar? Jo! Si ndjehem? Si zog! Po i jap fund karrierës me ekipin kombëtar, siç kam bërë ngaherë, me ndershmërinë dhe krenarinë time,” ka deklaruar Arda Turan para gazetarëve në konferencën e shtypit.
Lojtari më i dalluar turk i dekadës së fundit po bëhet gati të largohet dhe nga Barcelona, ku mungesa e hapësirave ia ka bërë të pamundur paraqitjet e nivelit të lartë, si ato me Atletikon e Madridit më herët.
Kështu, Arda Turan nuk do të zbresë në fushë në takimin mes Kosovës dhe Turqisë për eliminatoret e Botërorit 2018. /tesheshi.com/
