Prej sot, Arben Ahmetaj është në kërkim ndërkombëtar. SPAK i ka çuar një shkresë Interpolit për ta shpallur të tillë njeriun të cilin kërkon të arrestojë me akuza për fshehje pasurie.
Ish ndër më të fuqishmit e pushtetit socialist ndodhet jashtë Shqipërisë prej afro tre javësh, me imunitetin që iu hoq në mungesë, pa sqaruar nëse do i dorëzohet apo jo drejtësisë që vetë ka votuar e që partia e tij e ka për krenari qeverisjeje.
Ai, një prej emrave të përfshitë në aferën e Inceneratorëve nuk është nën akuzë për shkelje apo abuzime zyrtare në lidhje me to, por pasuri të fituar në rrugë abuzive e përfitime nga posti.
Emri i tij është i lidhur me dy pronarët e inceneratorëve, të dy në kërkim, Mirel Mërtiri dhe Klodian Zoto, te të cilët dyshohet se Ahmetaj kishte bankomatet e tij të përfitimeve të ndryshme financiare.
Edhe në perceptimin e publikut, Arben Ahmetaj mishëron një zyrtar thellësisht të korruptuar e jo ndonjë figurë potente në drejtime të caktuara menaxheriale. /tesheshi.com/
