“Iran Shahed”, anija iraniane me ndihma, ka arritur në Gjirin e Adenit, dhe pritet të mbërrijë në brigjet perëndimore të Jemenit më 21 maj, me gjithë paralajmërimet e Arabisë Saudite dhe SHBA-ve.
Ajo u nis më 11 maj nga porti iranian Bender Abbas, dhe ka në të 2.400 ton ushqime e 100 ton ndihma mjekësore.
SHBA-të e paralamëruan Iranin se duhet ta dërgojë anijen në Xhibuti, aty ku bashkërendohen punët për ndihmat humanitare që nisen drejt Jemenit. Gjithashtu Arabia Saudite e parajamëroi rishtas anijen iraniane të mos hynte në ujërat jemenase pa lejen e Jemenit.
Irani iu përgjigj paralajmërimeve duke bërë të ditur se as SHBA-të, e as Arabia Saudite, nuk kanë të drejtë të inspektojnë anijen iraniane me ndihma humanitare, e se ajo do të vazhdonte drejt destinacionit të paraparë.
Arabia Saudite e ka akuzuar Iranin për armatosjen e rebelëve jemenas, apo, ndryshe, të husinjve, dhe më herët ka bllokuar uljen në Jemen të dy avionëve civilë iranianë me ndihma.
Ndërkaq, pas mbarimit të armëpushimit pesëditor, vendet arabe të koalicionit kanë rinisur sulmet ajrore, duke goditur objektivat e rebelëve.
I dërguari i OKB-së ka kërkuar një shtyrje të armëpushimit , por pa marrë ende përgjigje.
Në të njëjtën linjë ka qenë dhe sekretari amerikan i Shtetit, John Kerry, i cili ka vazhduar ta mbështesë idenë e një armëpushimi, por duke e parë të vështirë në rrethanat aktuale. /tesheshi.com/
