Përfaqësuesi i Lartë i Bashkimit Evropian për politikën e jashtme dhe sigurinë, Josep Borrell, paralajmëroi se Evropa duhet të përgatitet për një luftë të mundshme me intensitet të lartë dhe ndoshta pa Shtetet e Bashkuara të Amerikës në anën e saj, transmeton Anadolia.
“Mundësia e një lufte konvencionale me intensitet të lartë në Evropë nuk është më një fantazi,” tha Josep Borrell në një event në Bruksel.
Duke thënë se “Rusia po kërcënon Evropën” me luftën e saj në Ukrainë dhe me sulme hibride ndaj shteteve të BE-së, Borrell tha se “lufta sigurisht që po afrohet rreth nesh”.
“Ne duhet të bëjmë gjithçka për ta shmangur këtë”, tha Borrell, duke shtuar se Evropa duhet të ketë mjetet për ta bërë këtë.
E ardhmja e sigurisë evropiane
Komentet e tij erdhën në mes të një debati në rritje mbi të ardhmen e sigurisë evropiane, ndërsa shefat ushtarakë dhe udhëheqësit në Evropën veriore shprehën shqetësimin për rrezikun e konfliktit të nxitur nga lufta e Rusisë kundër Ukrainës.
“Ne kemi nevojë për një mekanizëm të ri për financimin ndërqeveritar … të krahasueshëm me atë që krijuam gjatë krizës financiare (eurozonës),” tha Borrel.
Duke iu referuar presidentit amerikan Donald Trump, i cili ka kritikuar aleancën e Amerikës me Evropën, Borrell tha se “ombrella amerikane, në të cilën jemi mbështetur që nga Lufta e Ftohtë, mund të mos jetë e hapur gjatë gjithë kohës”.
“Ndoshta, varësisht se kush e sundon Uashingtonin, ne nuk mund të mbështetemi te Amerika për të na mbrojtur”, tha kreu i diplomacisë së BE-së. /tesheshi.com/
