Zëdhënësi i Ministrisë së Jashtme turke, Tanzhu Bilgiç, bëri një deklaratë menjëherë pasi televizioni shtetëror sirian njoftoi se militantët e ISIS-it që sulmuan Kobanin hynë në të nga Turqia, duke i mohuar fuqimisht pretendimet dhe duke i quajtur ato gënjeshtra.
Edhe zëvendëskryeministri turk, Numan Kurtulmush, i hodhi poshtë pretendimet e tilla, duke thënë se, “Deklarimet mbi sulmin në Kobani se mësymësit hynë në të nga Turqia janë krejtësisht të rreme. Ne publikuam pamjet filmike të incidentit. Agresorët iu qasën Kobanit nga qyteti verior kufitar sirian i Xherablusit.”
Zyrtari i lartë turk e ashpërsoi gjuhën kur tha se, “Disa organizata të pista, duke përdorur si shfajësim sulmet e fundit në Kobani, po përpiqen ta vendosin Turqinë në tabelën e qitjes.”
Po ashtu disa organe mediatike ndërkombëtare pretenduan se militantët e ISIS-it që shpërthyen një sërë makinash-bombë në Kobani ditën e sotme kishin hyrë në Siri përmes pikëkalimit kufitar të Myrshitpënarit në Suruç.
Agjencia turke e lajmeve, Anadolu Ajansı, publikoi pamje filmike që i hidhnin poshtë katërcipërisht pretendimet. Këto pamje filmike tregonin se kamioni i mbushur me lëndë shpërthyese nuk erdhi nga Turqia, e se ishte në Siri përpara se të shpërthente.
Militantët e ISIS-it shpërthyen një makinë në Kobani mëngjesin e sotëm, të pasuar pas mesdite nga shpërthime të tjera të makinave-bombë. Mësohet deri tani se nga sulmet kanë humbur jetën 35 persona, e janë plagosur dhjetëra të tjerë. Turqia i qëndron deklarimit se agresorët erdhën nga Xherablusi.
Gjashtëdhjetë e tre prej të plagosurve u sollën në Turqi për kurim, ndërsa raportohet se dy prej tyre kanë humbur më pas jetën, njëri prej të cilëve ishte i mitur.
