Dy anije luftarake të marinës amerikane po lundrojnë nëpër ujërat ndërkombëtare në ngushticën e Tajvanit, thanë tre zyrtarë amerikanë për Reuters, operacioni i parë i tillë që nga rritja e tensioneve me Kinën lidhur me vizitën e Kryetares së Dhomës së Përfaqësuesve të SHBA Nancy Pelosi në Tajvan.
Vitet e fundit, luftanijet amerikane, dhe herë pas here ato të vendeve aleate si Britania e Madhe dhe Kanadaja, kanë lundruar në mënyrë rutinore përmes ngushticës, duke zemëruar Pekinin.
Kina, e cila pretendon Tajvanin si territorin e saj, pavarësisht kundërshtimeve nga qeveria e zgjedhur në mënyrë demokratike në Taipei, nisi stërvitjet ushtarake pranë ishullit pas vizitës së Pelosit në fillim të gushtit dhe ato ushtrime kanë vazhduar.
Udhëtimi zemëroi Pekinin, i cili e pa atë si një përpjekje të SHBA-së për të ndërhyrë në punët e brendshme të Kinës.
Zyrtarët, duke folur në kushte anonimiteti, thanë të shtunën se kryqëzorët e marinës amerikane Chancellorsville dhe Antietam po kryenin operacionin, i cili është ende në vazhdim.
Ngushtica e Tajvanit ka qenë shpesh një burim tensioni ushtarak që kur qeveria e mundur e Republikës së Kinës iku në Tajvan në vitin 1949, pas humbjes së një lufte civile me komunistët, të cilët themeluan Republikën Popullore të Kinës. /tesheshi.com/
