Real Madridi është një klub shumë rigoroz. Këtë e tregon fakti se që nga shkarkimi i Vicente Del Bosques në vitin 2003, në Real Madrid asnjë trajner nuk ka vazhduar më tutje, kur në fund të sezonit nuk ka fituar asnjë trofe. Besojeni ose jo që prej vitit 2000, hierarkia madrilene ka emëruar 12 trajner të ndryshëm.
Në të kaluarën madje kemi parë trajnerë të cilët janë shkarkuar edhe pasi kanë fituar trofe, madje shumë me rëndësi. Italiani tjetër, Fabio Capello, pasi kishte fituar kampionatin spanjoll në sezonin 2006/07, u shkarkuar nga drejtuesit madrilien pasi nuk kishte arritur t`i përmbushë objektivat, synim titulli i Ligës së Kampionëve.
Për disa arsye edhe më të brishta ishte shkarkuar gjermani Bern Shuster, i cili po ashtu fitoi La Ligan dhe ishte larg ndjekësve më të afërt, mirëpo Presidenca e asaj kohe vendosi t`i japë fund bashkëpunimit me ish-lojtarin e tyre, pasi pati thënë para sfidës me Barcelonën se skuadra e tij nuk është në nivelin kompetitiv të blaugranasve.
Ancelotti ka besimin dhe marrëdhëniet e shkëlqyera me lojtarët madrilenë, mirëpo mbetet për t`u parë nëse kjo është e mjaftueshme për ta shpëtuar teknikun italian nga shkarkimi i postit si trajner i klubit mbretëror. /tesheshi.com/
