Ndërsa po sfidon hapur Perëndimin për çështjen e veriut, për të mos e lënë Serbinë që të bëjë ligjin aty, kryeministri Kurti ka dhënë një shfaqje tipike prej të nënshtruari ndaj Perëndimit në çështjen delikate LGBT, jo thjesht duke lejuar paradën famëkeqe të ashtuquajtur krenarie, por dhe duke u vënë në ballë të saj. Madje duke përcjellë dhe mesazh mbështetës, paçka faktit se në pushtet është dhe me votat e një elektorati që ka fe dhe atdhe. 
“Pjesëmarrësit e ‘Paradës së Krenarisë’ sot bënë thirrje publike për barazi dhe liri. Janë të papranueshme kërcënimet, abuzimet dhe diskriminimet që i përjetojnë pjesëtarët e komunitetit LGBTQIA+. Shoqëria dhe shteti duhet t’i mbrojnë dhe duhet të mësojnë për ta. Të gjithë së bashku duhet të besojmë në të drejtat e njeriut, në dinjitetin dhe integritetin e çdokujt. Njerëzit duhet t’i pranojmë, respektojmë dhe duam ashtu qysh janë”, shkruan Kurti, duke qenë në këtë pikë “më perëndimor se perëndimorët”.
Dhe nuk dihet nëse e beson atë që thotë, pra e ka bindje të vetën, apo për këtë aspekt kaq të ndjeshëm nuk zgjedh ta kundërshtojë Perëndimin.
Kujtojmë se diçka e tillë nuk ndodh ende në Tiranë, së paku që një kryeministër të dalë në ballë të një parade LGBT e të përcjellë mesazhe mbështetëse për ta. /tesheshi.com/
