Sekretari amerikan i Shtetit, John Kerry, e ka paralajmëruar këtë të mërkurë homologun e tij rus, Sergei Lavrov, se SHBA-të kanë për t’u dhënë fund bisedimeve mbi konfliktin sirian nëse Rusia nuk i ndal sulmet mbi Halep.
Zëdhënësi i Kerry-t, John Kirby, ka bërë të ditur se sekretari amerikan i Shtetit ka shprehur shqetësimin për sulmet siriane dhe ruse mbi spitalet dhe mbi infrastrukturën civile.
Kerry i ka thënë homologut rus në bisedën telefonike se i takon Rusisë barra e ndaljes së sulmeve dhe e garantimit të hyrjes së ndihmës humanitare.
“Shtetet e Bashkuara po bëjnë përgatitje për ta pezulluar angazhimin dypalësh midis SHBA-ve dhe Rusisë për Sirinë… nëse Rusia nuk ndërmerr hapa të menjëhershëm për t’u dhënë fund sulmeve mbi Halep dhe për të përtërirë ndërprerjen e luftimeve,” ka deklaruar John Kirby.
Prej sulmeve të fundit mbi pjesën lindore të Halepit, të nisura rrufeshëm pas dhënies fund armëpushimit të shkurtër, janë vrarë civilë e janë shkatërruar banesa. Situata në këtë pjesë të Halepit është nga më të vështirat gjatë tërë konfliktit më shumë se pesëvjeçar në Siri. /tesheshi.com/
