Sekretari amerikan i Mbrojtjes, Ashton Carter, lajmëroi dje se ushtria amerikane ka filluar të stërvisë në Jordani forcat e opozitës së “moderuar” siriane.
Carter-i bëri të ditur po ashtu se në javët e ardhshme do të nisë të stërvitet një grup tjetër i forcave opozitare.
Veç Jordanisë, janë dhe tre vende të tjera që pritet të hapin dyert për stërvitjen e trupave të opozitës siriane, posaçërisht Arabia Saudite, Katari dhe Turqia.
Kongresi Amerikan ka dhënë miratimin për një shumë prej 500 milionë dollarësh për stërvitjen e 5.000 luftëtarëve sirianë përgjatë një viti, por procesi nuk ka patur ritmin e duhur për shkak të përzgjedhjes së kujdesshme të atyre që do të stërviten.
Ministri turk i Punëve të Jashtme, Mevlüt Çavuşoğlu, njoftoi gjithashtu se brenda pak ditëve do të nisë dhe në Turqi stërvitja e forcave të moderuara opozitare siriane. Programi do të fillojë tre muaj pas nënshkrimit të marrëveshjes, në shkurt të këtij viti, pas kohës që ka marrë përgatitja e njësive të luftimit dhe transportimi i armatimit. “Fillimisht do të stërviten 300 persona, të cilët do të pasohen nga 300 të tjerë. Numri i luftëtarëve të stërvitur dhe të pajisur do të shkojë në 2.000 nga fundi i vitit,” bëri të qartë Çavuşoğlu. /tesheshi.com/
