Mëngjesi i kësaj të enjteje ka nisur me një tjetër zhvillim të acartë politik, e njëherësh të paprecedent, pasi nga Prezidenca është sulmuar gati hapur ambasada e SHBA dhe i gjithë misioni diplomatik në Tiranë, pjesa më aktive e lidhur me zhvillimet politike shqiptare, sidomos ato që kanë të bëjnë me Reformën në Drejtësi.
E gjitha ka ardhur pas një deklarate të përfaqësisë së Uashingtonit në Tiranë, ku kërkohet që ngërçi në Kushtetuese të çohet në Venecia.
Në mungesë të një institucioni të përshtatshëm ligjor, i cili mund të vendoste mbi intepretimet e kundërta, Shtetet e Bashkuara mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Gjithashtu, nxisim palët kundërshtuese që të respektojnë opinionin ligjor të Komisionit të Venecias. Ecja në këtë drejtim do të ishte tërësisht në përputhje me aspiratat europiane të vendit.Teksa Shqipëria ndërmerr këto reforma thelbësore, Shtetet e Bashkuara do të vazhdojnë të qëndrojnë në krah të saj si një vend mik, partner dhe aleat”, në deklaratën e Ambasadës Amerikane. Por kjo e irrituar akoma më shumë Ilir Metën, i cili me gjuhën e zëdhënësit, gati u ka shpallur luftë dhe trajtuar si “non grata”, misionin diplomatik në vend.
“Garantët e veprimeve të paligjshme dhe mafioze të Dvoranit e kanë marrë mbrëmë përgjigjen zyrtare në një bisedë zyrtare tepër të përgjegjshme të Kryetarit të Shtetit.
Tymi i Venecias që hodhi me porosi të Ramës, ambasadori në ikje i Agaçit pak ditë më parë, është turpi më i fundit i grupit të strukturuar diplomatik në Tiranë, bashkëfajtor për dhunimin sistematik të Reformës në Drejtesi dhe me qëllim kapjen e saj të plotë nga Regjimi monist i Edi Ramës.
Mjaft më ‘Rule of Embassy’. Është koha për ‘Rule of Law’ si çdo vend demokratik. Rruga e Elbasanit të çon në Elbasan dhe Rama e përdor dhe për në Xibrakë! Rruga e Kavajës të çon në Kavajë! Vetëm rruga e Kushtetutës na çon në Europën e Bashkuar!”, shkruan zëdhënësi i Tedi Blushi.
