Për herë të parë në 25 vite, SHBA-ja ka abstenuar në votimin e përvitshëm në OKB të një rezolute që kërkon t’i jepet fund embargos ndaj Kubës.
Njëzëshmërisht, 191 prej vendeve anëtare të Asamblesë së Përgjithshme votuan për miratimin e një rezolute që thekson nevojën për t’i dhënë fund embargos ekonomike, tregtare dhe financiare të vënë nga SHBA-ja ndaj Kubës.
Vetëm amerikanët dhe izraelitët abstenuan në votimin e tekstit që e mirëpret progresin në marrëdhëniet midis SHBA-së dhe Kubës.
Asambleja e Përgjithshme e OKB-së ka votuar për ta miratuar rezolutën që nga viti 1992, dhe SHBA-ja e ka kundërshtuar fort atë vijueshmërisht, duke votuar kundër.
Ambasadorja amerikane në OKB, Samantha Power, e portretizoi vendimin historik si një reflektim të politikës së re të angazhimit.
“Pas 55 e kusur vitesh ndjekjeje të rrugës së izolimit, ne po zgjedhim të marrim udhën e angazhimit,” nënvizoi përfaqësuesja amerikane.
Ministri i Jashtëm kubanez, Bruno Rodriguez, deklaroi se Kuba u ishte mirënjohëse përpjekjeve të ambasadores Power.
“Një ndryshim në votim nga Shtetet e Bashkuara është një sinjal premtues. Ne shpresojmë që ai të reflektohet në realitet.”
Megjithatë, çështja e embargos amerikane mbi Kubën varet shumë nga zgjedhjet presidenciale të nëntorit në SHBA; republikanët janë kundër heqjes së saj. /tesheshi.com/
