Ambasadori amerikan në Kosovë, Greg Delawie, i ka bërë sërish thirrje institucioneve të mos nguten për themelimin e ushtrisë.
Delawie ka thënë se SHBA-të kanë punuar gjatë që Kosova të ketë ushtri, por nëpërmjet ndryshimeve kushtetuese dhe në konsultim me të gjitha komunitetet në Kosovë.
Diplomati amerikan ka thënë se ka qenë i habitur me propozimin e presidentit Thaçi për ndryshimin e projektligjit të FSK-së, hap që për më tepër e ka bërë të ndihet i zhgënjyer duke marrë parasysh të gjithë përkushtimin e SHBA-ve për të ndërtuar kapacitetet aktuale të FSK-së.
Ambasadori amerikan ka përgënjeshtruar deklaratat e Thaçit dhe Veselit, të cilët kanë thënë se formimi i ushtrisë po ndodh në koordinim të plotë me partnerët.
“Kjo nuk është ajo se si ne e parashikuam se do të ndodhë procesi. Kjo me të vërtetë nuk e pasqyron përmbajtjen e diskutimeve që ne kemi pasur me zyrtarët e Qeverisë së Kosovës në të kaluarën e afërt. Ne punojmë shumë ngushtë në partneritet lidhur me këto çështje. Kjo është arsyeja pse disi u befasuam dhe u zhgënjyem kur ky projektligj u paraqit javën e kaluar sikur të kishte rënë nga qielli”, ka thënë Delawie, në një intervistë për Insajderin.
Ambasadori Delawie ka kërkuar nga institucionet që të ndalojnë nismën për themelimin e ushtrisë në këtë kohë, duke bërë thirrje që ato të reflektojnë për pasojat e mundshme nëse vazhdohet në mënyrën e propozuar javën e kaluar.
Pavarësisht këtyre thirrjeve Thaçi ka thënë se nuk ka kthim mbrapa dhe se ushtria do themelohet. /tesheshi.com/
