John Bass, ambasadori amerikan në Ankara, u dha përgjigje shqetësimeve për një plan për të ndryshuar demografinë apo kufijtë e rajonit.
Së fundi është pretenduar se koalicioni i udhëhequr nga SHBA-të synon të spastrojë etnikisht pjesë të Sirisë me operacionet e kryera kundër ISIS-it.
Në një intervistë për të përditshmen turke Star, ambasadori amerikan theksoi se, “Ne nuk kemi një synim, plan apo politikë të tillë. SHBA-të janë kundër ndryshimit të kufijve në këtë rajon. SHBA-të e mbështesin fuqimisht integritetin territorial të Turqisë, Sirisë dhe Irakut.”
Turqia ka vënë alarmin mbi krijimin e një territori të kontrolluar nga kurdët në kufi me të pasi PYD-ja, Partia e Unionit Demokratik Kurd, dhe YPG-ja, Njësitë e Mbrojtjes Popullore, morën prej ISIS-it qytetin kufitar të Tel Abjadit. Autoritetet turke kanë shprehur shqetësimin se operacionet kundër qyteteve strategjike siriane mund të jenë një dëshirë kurde për t’i nxjerrë me forcë nga rajoni turkmenët dhe arabët etnikë.
Presidenti turk, Rexhep Tajjip Erdogan, pati thënë më herët se druhej se PYD-ja dhe PKK-ja po mbushnin boshllëkun e lënë pas zmbrapsjes së ISIS-it dhe se kjo mund të krijonte një strukturë pranë kufirit me Turqinë, që do ta vinte në rrezik vendin.
Ambasadori amerikan u shpreh më tej, duke iu përgjigjur zërave për spastrim etnik të kryer nga kurdët në rajon: “Ne jemi plotësisht kundër që konflikti të shfrytëzohet për të ndryshuar në mënyrë të përhershme demografinë e rajonit. Veç kësaj, e konsiderojmë të rëndësishme që ata të cilët ikën nga Tel Abjadi për shkak të përplasjeve të kenë mundësinë të rikthehen në shtëpi kur të jetë rivendosur siguria.”
Që kur Njësitë e Mbrojtjes Popullore (YPG) të PYD-së luftuan në Kobani ndaj ISIS-it në janar, ata janë shfaqur si partnerët më të rëndësishëm në terren për koalicionin e udhëhequr nga SHBA-të.
John Bass e qartësoi dhe këtë pikë, duke sqaruar se, “Bashkëpunimi i kufizuar me PYD-në përfshin sulmet ajrore që SHBA-të kryejnë rreth kufirit turk kundër ISIS-it. Ne i kuptojmë shqetësimet e Turqisë, por bashkëpunimi ynë me PYD-në nuk është i përqendruar te Turqia. Ai nuk është për rrënimin e stabilitetit të Turqisë, e as synon të krijojë një shtet autonom kurd në kufirin turk.”
Turqia e çmon PYD-në si një zgjatim të PKK-së, organizatës terroriste me të cilën ka qenë në konflikt të kahershëm. /tesheshi.com/
