Nga Blendi Gashi
Korrupsioni s’luftohet me fjalë. Rastet korruptive duhet të gjykohen dhe ndëshkohen. Korrupsioni pengon Kosovën në integrimet evropiane dhe investitorët e huaj. Asnjë gjyqtar i korruptuar të mos punojë në sistemin e drejtësisë. Këto janë kritikat që kanë dhënë dy ambasadorët më të fuqishëm në Kosovë, ai i SHBA-ve dhe Britanisë së Madhe në tryezën “Lufta kundër korrupsionit. Dështimi dhe progresi” e organizuar nga Instituti i Drejtësisë në Kosovë.
Ambasadori i SHBA-ve në Kosovë, Greg Delawie tha se ka ardhur koha që rastet e korrupsionit të gjykohen dhe ndëshkohen.
Ai tha se ka vlerësuar rolin e shoqërisë civile në luftën kundër korrupsionit.
“Luftimi i korrupsionit është prioritet i imi dhe i SHBA-së në të gjithë botën. Ka vite me radhë që institucionet e Kosovës flasin për luftën kundër korrupsionit por vetëm kjo nuk mjafton. Shumica e prokurorëve dhe gjyqtarëve janë të aftë për ta luftuar korrupsionin. Për shkak të pozitës së rëndësishme që është besuar ju duhet të mos keni fare tolerancë për rastet që i trajtoni, asnjë gjyqtar i korruptuar nuk duhet të punojnë në sistemin e drejtësisë“, ka thënë ai.
Ai ka kërkuar përmirësimin e sundimit të ligjit dhe qytetarët do të kenë besim te institucionet.
“Korrupsioni është sfida më e madhe që ka Kosova por ju nuk jeni vetëm, gjatë viteve të ardhshme SHBA do të investojë 12 milionë euro në infrastrukturën e sistemit gjyqësor”, ka thënë ai.
Sistemi i drejtësisë ka dështuar në Kosovë
Ambasadori i Britanisë së Madhe Ruari O’Conell ka thënë sot se sistemi i drejtësisë ka dështuar në Kosovë. O’Conell si shembull konkret përmendi rastin e ish kryetarit të Kaçanikut Xhabir Zharku i cili është dënuar me dy vjet burg por që sipas tij atë nuk kanë mundur ta dërgojnë në vuajtjen e dënimit. Ai tha se është më shokuese pjesëmarrja e Zharkut në një aktivitet qeveritar në Suedi.
O’Conell ka hedhur kritika në drejtim të organeve të drejtësisë dhe gjyqësorit ku sipas tij edhe në rastin e ish-kryetarit të Gjykatës Themelore të Prishtinës Nuhi Uka, që është dënuar me vetëm dy vjet ndërsa dëmi i shkaktuar është më shumë se 60 mijë euro.
Ambasadori britanik tha se populli i këtij vendi dhe miqtë e saj ndërkombëtarë kanë shpresë për të ardhmen, por siq tha ai “fatkeqësisht kjo shpresë ka humbur”.
Ai madje përmendi edhe pasurimin e politikanëve në mënyrë të paligjshme por që organet e drejtësisë nuk kanë arritur që ta luftojnë këtë dukuri.
“Kosova ka nënshkruar MSA-në që do të thotë se Kosova do të trajtohet si çdo vend i Evropës dhe se tashmë ka ardhur koha që udhëheqësit e ligjit ta luftojnë pa kompromis korrupsionin. Korrupsioni pengon Kosovën në integrimet evropiane dhe investitorët e huaj. Çdo devijim e pengon Kosovës në rrugën e saj”, tha ambasadori britanik.
Kuçi: Luftimi i korrupsionit është krucial për integrim në BE
Ministri i Drejtësisë Hajredin Kuçi tha se shteti ka shumë punë për të bërë në luftimin e rasteve korruptive.
Kuçi tha se për luftimin e korrupsionit duhet angazhuar e tërë shoqëria kosovare.
“Aspiratat tona për integrim në BE lidhen me ligjin dhe respektimin e tij, dhe luftimi i korrupsionit është krucial për integrim”.
“Ka ardhur koha që Kosova të ketë një adresë të luftimit të korrupsionit në veçanti të nivelit të lartë dhe se duhet të kemi një individ që identifikohet me luftimin e korrupsionit. Ne duhet të krijojmë një hierarki në luftimin e kësaj dukurie. Sistemi në Kosovë ka shumë njerëz të ndershëm, profesionalë dhe të paanshëm, dhe këta njerëz duhet t’i fuqizojmë”, theksoi Kuçi.
Ai u ka bërë thirrje prokurorëve, hetuesve dhe qytetarëve që t’i vënë në funksion mekanizmat e tyre për t’i treguar rastet e korrupsionit.
/tesheshi.com/
