Udhëheqësi suprem i Iranit, Ali Hamenei, ka ngritur tonet dje ndërsa është betuar se nuk do të lejojë inspektimin ndërkombëtar të vendeve ushtarake apo intervistimin e shkencëtarëve iranianë nën një marrëveshje bërthamore me fuqitë botërore.
Ajetullah Ali Hamenei deklaroi se Irani do t’i rezistojë “shtrëngimit dhe kërkesave të tepruara” nga Amerika dhe fuqitë e tjera botërore.
Ai tha se Teherani nuk do të pranonte “kërkesa të paarsyeshme” gjatë negociatave për një marrëveshje për programin bërthamor të vendit të tij.
Në komentet e transmetuara drejtpërdrejt në televizionin shtetëror, Hamenei theksoi se vendi i tij nuk do t’u dorëzohej presioneve.
Në Vienë ka nisur një raund i ri bisedimesh mes negociatorëve nga Irani dhe grupit prej gjashtë vendesh, ku bëjnë pjesë SHBA-të, Rusia, Kina, Gjermania, Franca dhe Britania. Në tryezë po negociohet arritja e një marrëveshjeje përfundimtare, e cila i vë fre programit bërthamor të Iranit dhe në shkëmbim mundëson heqjen e sanksioneve ekonomike. Në mars është arritur një marrëveshje kornizë, ndërsa gjithçka pritet të mbyllet gjer më 30 qershor.
Hamenei la të kuptohej se amerikanët po i rrisnin kërkesat e tyre, dhe po ushtronin presion që në marrëveshjen përfundimtare të përfshiheshin intervistat me shkencëtarët iranianë dhe inspektimi ndërkombëtar i vendeve ushtarake të Iranit.
“Unë nuk do t’i lejoj të huajt t’i intervistojnë shkencëtarët e dashur dhe bijtë e këtij vendi,” tha ai. /TESHESHI.COM/
