Lideri opozitar rus, Aleksei Navalny ka premtuar se do të vazhdojë të mbajë protesta, të cilat kanë tërhequr tashmë mijëra qytetarë anembanë Rusisë.
Navalny u ndalua nga policia për rreth 10 orë, dhe u konsiderua si një masë për ta ndaluar atë që të udhëhiqte një protestë, e konsideruar nga Kremlini si e paligjshme.
“Ne nuk do të ndalemi, pavarësisht pengesave”, ka thënë Navalny për gazetarët, të cilët e prisnin para stacionit policor, ku ai shtoi se po planifikon të marrë pjesë edhe në protestën në Orenburg.
Që kur kishte shpallur kandidaturën e tij për zgjedhjet presidenciale vitin e kaluar, Navalny, 41-vjeçar, një kritik i fortë i presidentit Vladimir Putin, ka hapur më shumë se 60 zyra të fushatës në rajone të ndryshme në Rusi.
Në qershor, Komisioni Qendror i Zgjedhjeve në Rusi ka thënë se Navalny nuk mund të kandidojë për post publik, për shkak të një dënimi rreth një krimi financiar, që thuhet së ishte i motivuar politikisht.
“Plani për të bllokuar protestat rajonale, nuk do të funksionojë”, ka shkruar Navalny në Twitter, pas lirimit nga policia.
“Kremlini i sheh takimet e mia me votuesit, si një kërcënim të madh dhe si fyerje, në fund të fundit, askush nuk shkon në takimet e tyre nëse nuk paguhen”, ka shtuar ai.
Navalny, stafi i tij dhe shumë përkrahës në protesta, janë ndaluar në vazhdimësi nga policia dhe disa nga mbështetësit janë sulmuar apo janë përballur me persekutime nga autoritetet në muajt e fundit.
“Human Rights Watch”, në një deklaratë thotë se autoritetet ruse po ndërhyjnë në mënyrë “vazhdueshme” në përpjekjet e Navalny-t për të kandiduar për president, përfshirë ndalimin e vullnetarëve të kampanjës së tij dhe veprime tjera kundër përkrahësve të tij.
Navalny postoi arrestimin e tij në rrjetin social Instagram, duke shkruar se ai ishte ndaluar nga policia, ndërsa po dilte nga apartamenti i tij. “Kështu, Putini nuk do që unë të marr pjesë në protesta”, shkroi ai.
Ministri i Brendshëm rus ka thënë se Navalny është ndaluar nga policia e Moskës pasi ka bërë “thirrje të vazhdueshme” që njerëzit të marrin pjesë në protesta të paligjshme.
Nëse gjykata vendos se Navalny ka thyer rregullat për protesta dhe tubime publike, ai mund të dënohet me 30 ditë burgim.
Në anën tjetër, Navalny dhe stafi i tij thonë se protesta në Nizhny Novogorod ishte e ligjshme. Në blogun e tij, Navalny ka përsëritur kërkesën te autoritetet për të lejuar atë të protestojë në Shën Petersburg, që është qyteti i lindjes së Putinit, por atij nuk i është ofruar ndonjë vend i kënaqshëm.
Ai ka thënë se do të bëjë kërkesë që protesta të mbahet në parkun qendror të qytetit, duke shtuar se do t’u bëjë thirrje përkrahësve të tij për të protestuar në Sheshin e Pallatit, nëse kjo kërkesë e tij për parkun qendror refuzohet. /tesheshi.com/
