Në profilin e saj në Facebook, deputetja nga radhët e Vetëvendosje, Albulena Haxhiu ka reaguar ndaj deklaratave të deputetes serbe Maria Obradoviq.
Ajo përmes këtij reagimi ka treguar arsyet se përse ajo lëshoi seancën e cila ishte organizuar nga “Grupi i Grave deputete” të Kuvendit dhe OSBE-ja.
“Sot, ca gra deputete, saktësisht dy gra deputete, shkelën një pas një vendimet që i kishte marrë bordi i GGD. Së pari, fjala nuk i është dhënë, dhe as nuk e kanë ftuar ta marrë fjalën, nënkryetaren e Kuvendit Aida Dërguti, të cilën vetë kishin thënë se do ta ftonin. Së dyti, të pranishëm në sallë ishin afërsisht 10 deputete nga Serbia për të cilat na kishin thënë se do të merrnin pjesë si mysafire duke u ulur në pjesën e katit të dytë ku rrinë të ulur zakonisht ambasadorët ose përfaqësuesit tjerë. Së treti bordi i GGD, kishte marrë vendim që secili grup parlamentare të ketë të drejtën e fjalës”, ka shkruar Haxhiu.
Lexoni reagimin e plotë të Haxhiut:
REAGIM:
Sot u mbajtë nje seancë e Kuvendit të Republikës së Kosovës në të cilën pati disa diskutime dhe u transmetua një dokumentar, e gjitha kjo e organizuar nga “Grupi i Grave deputete” të Kuvendit dhe OSBE-ja.
Duhet thënë hapur “Grupi i Grave deputete” është reduktuar në një mekanizëm që po përdoret për vetëpromovim në dëm të çështjeve gjinore, duke cenuar në formë madje edhe Republikën.
Sot, ca gra deputete, saktësisht dy gra deputete, shkelën një pas një vendimet që i kishte marrë bordi i GGD. Së pari, fjala nuk i është dhënë, dhe as nuk e kanë ftuar ta marrë fjalën, nënkryetaren e Kuvendit Aida Dërguti, të cilën vetë kishin thënë se do ta ftonin. Së dyti, të pranishëm në sallë ishin afërsisht 10 deputete nga Serbia për të cilat na kishin thënë se do të merrnin pjesë si mysafire duke u ulur në pjesën e katit të dytë ku rrinë të ulur zakonisht ambasadorët ose përfaqësuesit tjerë. Së treti bordi i GGD, kishte marrë vendim që secili grup parlamentare të ketë të drejtën e fjalës.
Si përfundim, përfaqësueseve nga opozita nuk i’u dha fjala, pra folën vetëm dy gra (nga partitë në pushtet), fjala nuk ju dha grupeve te tjera parlamentare, por fjala iu dha njërës prej deputeteve serbe, e cila fjalimin e saj e nisi me “E keni shkelur marrëveshjen. Ne jemi marrë vesh që këtu mos të përmendej fjala Republikë …”. Në këtë moment u ndjeva e detyruar ta lëshojë seancën për dy arsye: na u mohua e drejta e fjalës dhe u ofenduam drejtpërdrejtë nga foltorja e Kuvendit nga një deputete serbe e cila ka ardhur në Kosovë të na tregojë se si ende ata besojnë se jemi koloni e Serbisë, dhe kjo e gjitha e marrë vesh më herët me disa nga gratë deputete, që mbetet të kuptohen se kush janë ato! Solidariteti gjinor nuk mund të ekzistojë mes grave që i mohojnë grave të tjera të drejtat. /tesheshi.com/
