Intervistoi: Blendi Gashi
Një prej deputetëve më të zëshme të Parlamentit, Albulena Haxhiu e VV-së në një intervistë dhënë për portalin tesheshi.com ka folur për herë të parë për mosreagimin e grave deputete për fyerjen që asaj ia bëri kryekuvendari Kadri Veseli, për punën që bëjnë gratë deputete, incidentin e fundit kur deputetët e opozitës u penguan për të hyrë në Kuvend.
Haxhiu, poashtu tregon nëse do të ndërmarrin ndonjë aksion simbolik në seancën e 6 nëntorit kur deputetëve do t’i drejtohet Komisioneri i BE Johannes Hahn, për atë nëse duhet të thirret seancë e re për miratimin e buxhetit, për protestat e paralajmëruara të opozitës, për mundësinë e shkuarjes në zgjedhje dhe krejt në fund çfarë mund të ndodh në vitin 2016 në skenën politike kosovare.
Ju konsideroheni njëra prej deputetëve më të zëshme të Parlamentit. Sa po i mbrojnë interesat e të zgjedhurve të tyre gratë deputete?
Kuvendi i Republikës së Kosovës ka 39 gra. Si grua, si nënë dhe si qytetare, si deputete do të doja të shihja një angazhim shumë më të madh dhe më të përkushtuar të grave deputete për çështje që prekin më shumë gratë (duke mos përjashtuar këtu çështjet tjera) drejtëpërsëdrejti, p.sh.: pushimi i lehonisë, trashigimia dhe pronësia, kujdesi shëndetësor, mundësitë e barabarta në punësim, gratë e veja si pasojë e luftës së fundit, gratë e dhunuara gjatë luftës.
Derisa politika jonë në Kosovë akoma lë shumë për të dëshiruar, jam optimiste që në vitet e ardhshme, kjo situatë do të ndryshojë për së miri. Vetëm një angazhim i grave dhe burrave bashkë do të mund ta përmirësonte gjendjen aktuale.
Grupi i grave deputete nuk reagoi për fyerjen që iu bëri kryekuvendari Veseli. Pse sipas jush nuk reaguan? Kryetarja e këtij grupi Blerta Deliu ka thënë se arsyeja është se Veseli kërkoi dy herë falje…
Mjerisht edhe Grupi i Grave Deputete apo GGD siç e quajmë shkurtimisht, është instrumentalizuar nga krerët e partive. Tashmë në bord gjenden gra të cilat janë zgjedhur me propozim të burrave të partive dhe duke i anashkaluar gratë tjera brenda partisë. Prandaj, ato gra janë në mbrojtje të burrave që i kanë ngritur në pozita dhe kjo nuk më befason.
Si e sheh pengimin e opozitës për të hyrë në objektin e Kuvendit por dhe gjuhën që përdori Ramush Haradinaj ndaj rivalëve politikë, në veçanti ndaj punëtorëve të sigurimit?
Pengimi i liderëve të opozitës për t`u futur në Kuvendin e Republikës së Kosovës ka qenë i paprecedent dhe përbën shkelje e Kushtetutës dhe ligjit për të drejtat dhe përgjegjësitë e deputetit.
Deputetët në bazë të Ligjit për të drejtat dhe përgjegjësitë e deputetëve kanë të drejtën e qasjes në të gjitha institucionet pa asnjë pengesë. Rregulloret e brendshme të Kuvendit dhe çfarëdo vendimi janë akte nënligjore e që si të tilla janë të kundërligjshme nëse me to tentohet kufizimi i autorizimeve që janë të garantuara me ligj.
Me urdhrin e paligjshëm për ndalimin e opozitës, Kadri Veseli po e konsideron Kuvendin sikur të ishte pronë e tij duke bërë kështu keqkuptim të pozicionit që mban. Ne nuk mund t’i bindemi urdhrave të tij të paligjshëm andaj edhe do t’i kundërshtojmë si të tilla. Prandaj, sjellja e opozitës atë ditë ishte e nevojshme në rrethanat e krijuara.
Në seancën e fundit gjatë fjalimit të presidentit të Austrisë në Kuvend, partia juaj shpalosi një pankartë. Me 6 nëntor Komisioneri i BE-së, Johannes Hahn do t’i drejtohet deputetëve. A do të merrni pjesë në këtë seancë, nëse po a do të shpalosni sërish të njëjtën pankartë?
Më 29 tetor, përgjatë kohës sa presidenti austriak po fliste para deputetëve të Kuvendit, ne shpalosëm dy pankarta me mbishkrimin “Ruaje shpinën z. President, gënjeshtarë të korruptuar janë ulur prapa teje!” si dhe “Mjaft me kënaqjen e hegjemonisë së Serbisë!”.
Po ashtu më 6 nëntor deputetëve do t’i drejtohet Komisioneri i BE Johannes Hahn në të cilën seancë plenare ne do të jemi të pranishëm. Natyrisht që nuk do t’i përdorim pankartat e njëjta dhe ende nuk kemi diskutuar në lidhje me performancën.
Nëse Kryesia cakton një seancë ku pikë e vetme e rendit të ditës do të caktohej miratimi i buxhetit, a do të merr pjesë opozita, konkretisht VV ?
Nuk do të duhej të kishte seanca tjera, pas seancës të së premtes. Madje kjo ka qenë kërkesa jonë si opozitë që nga fillimi. Meqë rrethanat nuk kanë ndryshuar (nuk ka tërheqje nga marrëveshjet), kryesia e Kuvendit nuk duhet të thërras seanca të reja, as për buxhetin. Është koha e fundit kur Kuvendi të mbrohet nga abuzimet që po ia bënë qeveria.
A pritni që brenda një kohe të shkurtër të gjendet zgjidhja për të kthyer normalitetin në Kuvend. Nëse jo, a do të vazhdoj opozita të hedh gaz lotsjellës dhe a keni ende boca gazi. Pra çfarë parashihni…?
Kjo varet nga Isa Mustafa. Normaliteti në Kuvend kthehet kur Mustafa të tërheq marrëveshjet. Ai është para dy rrugëve. Tërheqje të marrëveshjeve ose dorëheqje. Nëse i njëjti e lidh fatin e tij me marrëveshjet, atëherë le të bien edhe Isa Mustafa edhe marrëveshjet.
Nëse qeveria e Mustafës injoron kërkesat e opozitës dhe peticionin me mbi 200 mijë nënshkrime (i cili peticion është më i madhi prej pasluftës), atëherë ne nuk do të zmbrapsemi, përkundrazi do të vazhdojmë përpjekjet tona për mbrojtje të Republikës dhe territorit. Do të vazhdojmë me veprimet e njëjta e të ngjashme. Kemi gazë lotsjellës më shumë sesa që ka Kuvendi deputetë. E kemi “dhuratë” nga policia e Kosovës në protesta e demonstrata.
Keni paralajmëruar edhe protesta që sipas jush priten të jenë masive. A është caktuar data, nëse jo kur pritet të ndodh përafërsisht?
Që nga 25 gushti situata në Kosovë nuk është më e njëjtë. Që nga ajo ditë, ne si subjekt politik dhe si opozitë po ashtu jemi angazhuar në forma të ndryshme.
Nga tribunat në qytetet e mëdha të Kosovës, në tubime me qytetarë e që po vazhdojnë ende, deri tek aksionet në rrugë e Kuvend. Po ashtu kemi organizuar peticionin në kundërshtim të këtyre marrëveshjeve.
Padyshim që pas këtyre pritet organizimi i protestave e demonstrative. Sapo të caktohet data, do t’iu njoftojmë të gjithëve.
Keni bërë të ditur se nuk do t’i përgjigjeni thirrjes së Prokurorisë. Pse nuk do ta bëni një gjë të tillë?
Veprimet tona në Kuvend janë veprime politike në mbrojtje të Republikës dhe territorit, pra nuk kanë fare të bëjnë me drejtësinë dhe çfarëdo tendence e këtyre institucioneve për përndjekje politike e konsiderojmë si qëllim për t’i ndalur zërat kundërshtues të këtyre marrëveshjeve të dëmshme.
Ne nuk do t’i përgjigjemi ftesës së prokurorisë pasiqë është absurde për veprimet tona politike në Kuvend të kërkohemi me ngulm.
Do të doja shumë që t’i shihja institucionet tona të drejtësisë të merren me rastet e korrupsionit e krimit të organizuar të këtyre pushtetarëve dhe familjarëve të tyre. Pra këto institucione do të duhej të ishin të përkushtuara të merren me këto raste dhe jo me përndjekje të opozitës për veprime politike.
Ky është një shembull i keq kur i tërë sistemi vihet në mbrojtje të atyre që po e defunksionalizojnë shtetin.
Nëse vendi shkon në zgjedhje të parakohshme, a jeni të gatshëm si opozitë e përbashkët t’i hyni kësaj gare?
Në këtë kohë e kemi prioritet ndaljen e marrëveshjeve të dëmshme, mirëpo nëse qeveria Mustafa nuk tërheqë këto marrëveshje, atëherë natyrisht që zgjedhjet janë të pashmangshme.
Kurdo që ato të mbahen ne jemi të gatshëm. Ende nuk kemi pasur diskutime në lidhje më atë se si do të marrim pjesë siopozitë apo ndaras si subjekte politike.
Për fund, si e shihni vitin që po vjen në sferën politike?
Vitin 2015 e kemi nisur me protestat kundër një ministri fashist siç ishte Jabllanoviqi dhe me shumë gjasë do të përfundojë me protesta kundër “Zajednicës” dhe demarkacionit me Malin e Zi.
Është e rëndësishme që ta kuptojmë se ky koalicion qeveritar është krijuar për dy synime kryesore: ta krijojë Gjykatën Speciale që e gjykon luftën e UÇK-së si dhe ta themelojë “Zajednicën” e cila e ndan etnikisht dhe e defunksionalizon Kosovën. Ndonëse kishin fituar vota duke mashtruar qytetarët me vende pune, e njëjta qeveri vetëm dëme po i sjellë vendit.
Duke e ditur që në krye të institucioneve të vendit kemi njerëz që janë në gjendje të pranojnë gjithçka për të shpëtuar veten, natyrisht që Republika dhe qytetarët rrezikohen në vazhdimësi. Ajo se për çfarë ne angazhohemi, në çfarëdo periudhe kohore, është ndalja e këtyre dëmeve që po ia sjellin Kosovës këta politikanë të korruptuar. /tesheshi.com/
