Një përplasje “gjigandësh” ka ndodhur në tregun e telefonisë së lëvizshme në Shqipëri menjëherë pas futjes së operatorit gjerman T-com në tregun shqiptar, i cili ka blerë AMC-në dhe e ka shndërruar në Telekom Albania.
Kompania tjetër e madhe në lëminë e telefonisë, ALBtelecom, e konsideron si një shkelje, përdorimin e emrit nga kompania tjetër.
Në një deklaratë për shtyp, të firmosur nga Drejtori i Përgjithshëm i ALBtelecom, Erkan Tabak, i bëhet thirrje operatorit gjerman që të tërhiqet dhe të mos pëdorë emrin tregtar që kompania turke zotëron pas blerjes së ndërmarrjes historike të shtetit shqiptar.
Në deklaratën e ALBtelecon theksohet: “Përdorimi i emrit Albanian Telecom nga kompani të tjera sëbashku me të gjitha versionet e mundshme të tij dhe i cilitdo emër që në mënyrë direkte sjell në vëmendje emrin Albanian Telecom dhe përkthimet e tij, është tërësisht i ndaluar bazuar në ligjet tregtare shqiptare në fuqi, dhe direktivat e Bashkimit Evropian.
Albanian Telekom/Telekomi Shqiptar nuk është vetëm një emër kompanie, por gjithashtu edhe një pronë historike e Shtetit Shqiptar. Fakti që regjistrimi i emrit Telekom Albania, që ngjan identikisht me Albanian Telecom thjesht me një radhitje tjetër të fjalëve, është jo vetëm kundër ligjeve tregtare në fuqi, por edhe kundër kodeve të QKR-së dhe praktikave të Autoritetit të Konkurrencës.
Për arsyet më sipër, është shumë surprizuese për ALBtelecom që të shohë përdorimin zyrtar dhe lançimin e emrit të kësaj kompanie nga një kompani tjetër. Gjithësesi, pavarësisht së më lart, ne ende besojmë se ky nuk është veprim i paramenduar, por një pikë pakujdesie brenda institucionit.
ALBtelecom është gati për të përdorur të gjitha të drejtat ligjore lidhur me këtë çështje, gjithësesi ka besim të plotë se ndryshimet përkatëse do të ndodhin dhe në këtë mënyrë nuk do të ketë nevojë për veprime ligjore”.
/tesheshi.com/
