Edhe pse me një status jo fort të gjatë, kryeministri i rrëzuar Albin Kurti i është qasur filozofikisht asaj që i ndodhi atij dhe kabinetit të tijnë Kuvend, ku një mocionmosbesimi i ndërmarrë nga partneri LDK, i preu në mes qeverisjen pas 50 ditësh.
Për Kurtin, kjo ishte diçka që duhej të ndodhte.
“Ishte kjo një rënie e domosdoshme për ngritjen e nevojshme. Pa rënë qeveria si përbërje nuk bëhet dot qeverisja si përmbajtje. Jo se e kemi ditur, gjithsesi e morëm vesh”, shkruan Kurti, duke besuar në një rikthim të tij të sërishm në krye të qeverisjes.
“Mbledhja e djeshme e kuvendit do të ishte mirë të mbahej mend gjatë. Mirëpo, nuk do të ndodhë kështu, sepse ne do të fitojmë. Pra, e ardhmja është e jona, ndërkohë që do ta humbim një tragjedi”, shprehet Kurti.
Më tej, si shpalos kulturën e tij në retorikën politike me plot stil filozofik.
“Ky kuvend nuk e beson këtë qeveri sepse i nënshtrohet qeverisë si të tillë. Qeveria jonë nuk e beson këtë kuvend sepse e dashuron kuvendin si të tillë.
Saktë e kishte thënë mbrëmë Prof. Enver Hasani: mosbesimi ishte koniuktural. Kur përfaqësimi demokratik bie në koniukturë politike, tjetërsimi bëhet normë.
Qëllimi i mosbesimit nuk ishte rrëzimi i qeverisë sa dobësimi i qeverisjes. Ndërkaq kuptimi i mosbesimit ishte porosia ambasadorit Grenell: në Kosovë janë mbi 80 deputetë të gatshëm të rrezikojnë edhe jetët e qytetarëve vetëm që të kalojë shkëmbimi presidencial”, shkruan Kurti, që e mbyll statusin e tij pa finale filozofike.
“Do të vazhdojmë si qeveri në detyrë. Jemi qeveri me detyra dhe jo qeveri e detyruar.
Para së gjithash, duhet ta luftojmë bashkë pandeminë Covid-19. Mbi të gjitha, le t’i rrimë popullit afër se Kosova është shtëpia jonë”. /tesheshi.com/
