(Shkrim i publikuar pak javë më parë, pas një arrestimi të rradhës së politikanit rebel)
Nga Blendi Gashi
Nëse një politikan ka lindur për të protestuar, ai pa dyshimin më të vogël është Albin Kurti, njeriu që një pjesë të mirë të jetës e ka pas hekurave, ndërsa prangat ndër duar i janë bërë si byzylykë të zakonshëm.
Albin Kurti është një histori njerëzore, pa dyshim dhe politike, krejt unike. Që në të ri, ai shkëndijoi në karakter si një antiserb i pakompromis, jo në kuptimin nacional, por në atë politik, duke e kundërshtuar fuqishëm serbizimin e Kosovës. Dhe që atëherë, e gjitha jeta e tij ka qenë e bashkëshoqëruar me burgun, prangat, të cilat i ka të pranishme dhe sot, gjithmonë për të njëjtat arsye.
Para lufte ishte në krye të protestave studentore. Pa u trembur aspak qëndronte para kordonit të policisë serbe, protestonte për padrejtësitë që i bëheshin shqiptarëve të Kosovës. Ishte një që dallohej lehtë, këtë e bënin të mundur flokët e gjata që mbante në ato vite.
Edhe pas përfundimit të luftës Kurti ishte organizator i shumë protestave me ç`rast është arrestuar disa herë.
Hera e fundit kur u arrestua Albini dhe u lirua pas dy orësh ishte 12 tetori 2015 (mbrëmë). Eskalimi i situatës mes protestuesve (aktivistëve të VV-së) dhe Policisë së Kosovës, bëri të veten që Kurti të lihej i lirë, pasi Prishtina nisi të merrte flakë.
Portali tesheshi.com pas ndodhive të fundit ka bërë një shkrim të veçantë për Albin Kurtin, arrestimet e tij të ndodhura gjatë viteve, në mënyrë që lexuesi të mësojë saktë sa vite ka qëndruar në qeli ish-kreu i VV-së, para dhe paslfutës.
Arrestimi i Kurtit nga policia serbe
Ishte data 27 prill 1999, kur policia serbe e arrestoi. Më 10 qershor, me tërheqjen e forcave serbe në Serbi, ai së bashku me të burgosurit tjerë shqiptarë u transferua në burgjet serbe. Më 13 mars 2000 në Nish, Albini u dënua me 15 vjet burg të rëndë.
Gjatë gjykimit ai refuzoi të njihte legjitimitetin e gjykatës duke thënë: “Ky gjyq nuk ka asgjë të përbashkët me të vërtetën dhe drejtësinë. Ky gjyq i shërben politikës ditore të regjimit të Milosheviçit që e ka mbajtur Kosovën nën okupim“. Kur u dënua, ai tha: “Nuk është me rëndësi nëse më dënoni dhe sa më dënoni. Çdo gjë që kam bërë e kam bërë vullnetarisht dhe me dinjitet, jam krenar për këtë dhe po të më ipej rasti do të veproja sërish njësoj.” Si rezultat i presionit ndërkombëtar Albini u lirua më 7 dhjetor 2001.
Ja sa herë u arrestua Albini pas luftës
Albini si udhëheqës i ‘Vetëvendosjes’, ka organizuar edhe shumë protesta pas përfundimit të luftës duke u përballur kështu me të gjitha qeveritë.
Më 12 qershor të vitit 2005 në muret që rrethonin ndërtesën e UNMIK-ut, aktivistët shkruan parullën ‘Jo negociata, Vetëvendosje’. Kjo solli transformimin e KAN-it në Lëvizjen ‘Vetëvendosje’.
Këtu do të fillonte një rrugë e gjatë e Kurtit në përballjet e Kurtit me qeveritë e Kosovës dhe UNMIK-un.
Proceset kundër Kurtit rifilluan me arrestimin e tij.
Më 10 shkurt 2007 ditën që ‘Vetëvendosje’, organizoi demonstratën paqësore në Prishtinë kundër Planit Ahtisari.
Gjatë kësaj proteste u vranë dy protestues, Mon Balaj dhe Arben Xheladini dhe u plagosën edhe 80 persona tjerë.
Në vend që të arrestohen përgjegjësit që vranë dy protestuesit, u arrestua Albini i cili u mbajt në burg për 5 muaj dhe nën arrest shtëpiak edhe 5 muaj e gjysmë të tjerë.
Shkrimi i parullave vazhdoi gati në të gjitha fshatrat dhe qytetet e Kosovës, dhe pastaj lëvizja filloi me përdorimin e metodave tjera kreative e të padhunshme sikurse janë aksionet simbolike, bllokadat dhe së fundi edhe demonstratat masive.
Atë kohë Shërbimi Policor i Kosovës në bashkëpunim me policinë ndërkombëtare arrestoi, burgosi dhe dënoi qindra aktivistë, ndër ta edhe Albinin.
Ish kreu i VV-së ishte arrestuar edhe në protestën e 27 janarit të vitit 2015, protestë e cila kishte eskaluar me ç’rast ishin lënduar shumë policë e protestues.
VV: Sa burg ka bërë Albini po t`i mbledhësh të gjitha arrestimet
Portali tesheshi.com ka kontaktuar me zëdhënësin e ‘Vetëvendosjes’, Frashër Krasniqi i cili nuk kanë të dhëna të sakta për sa here është arrestuar Kurti.
“Na merr shumë kohë me bo hulumtim sa herë është arrestuar dhe sa vite ka qëndruar në burg Albini. Afërsisht, pas luftës ka ba 1 vit burg, nëse i mbledhim të gjitha arrestimet. Ndoshta pak më shumë. Është arrestu dhjetëra herë. Në kohën e UNMIK p.sh. është arrestu mbi 12-13 herë”, ka thënë Krasniqi për tesheshi.com.
Kush është Albin Kurti
Albin Kurti ka lindur më 24 mars 1975 në Prishtinë. Në gusht të vitit 1997 Albini u kyç në Unionin e Pavarur të Studentëve të Universitetit të Prishtinës, si anëtar i kryesisë e më vonë si zyrtar për marrëdhënie ndërkombëtare. Kurti ka qenë gjithashtu edhe anëtar i Këshillit Organizativ të protestave paqësore dhe studentore për lirimin e objekteve universitare të uzurpuara me dhunë nga regjimi i Milosheviqit. Ai ishte njëri ndër udhëheqësit e protestës historike studentore më 1 tetor 1997 e cila u shtyp brutalisht nga policia e Milosheviqit. Kur filloi lufta në Kosovë, në gusht të vitit 1998, Albini filloi punën në zyrën e përfaqësuesit të përgjithshëm politik të UÇK-së, Adem Demaçit, ku shërbeu si sekretar i zyrës.
Më 23 prill 2003, Albini diplomoi në fakultetin e Shkencave Kompjuterike dhe Telekomunikacionit në Universitetit e Prishtinës dhe vazhdoi të jetë aktivist i të drejtave të njeriut dhe atyre civile.
Jeta private
Pa dyshim si një person shumë i njohur në botën e politikës Albin Kurti gjithashtu i njohur për vendin e rëndësishëm që i jep prodhimit vendor në programin e tij politik, u përfol shumë gjatë fillimit të vitit 2014. Pas një kohe të gjatë, në moshën 39-vjeçare Kurti vendosi t`i jepte fund beqarisë duke kurorëzuar lidhjen e tij të dashurisë me martesë. Ai u martua me norvegjezen Rita Augestad gjatë muajit Prill në një ceremoni modeste kurorëzimi. /tesheshi.com/
