Albin Kurti premton pas lirimit: Nuk do të ndalemi, të mbetemi të bashkuar

Pas marrjes në pyetje nga policia e Kosovës, diku rreth mesnatës u lirua ish-lideri i Vetëvendosjes Albin Kurti. Me t’u liruar nga policia, Kurti  ka mbajtur fjalim para teatrit kombëtar ku ka treguar detajet e arrestimit.

Sipas tij, rreth 15 policë në Çagllavicë i kanë ndalur atij makinën dhe pa asnjë fletarrest kanë dashur ta arrestojnë, mirëpo meqënëse “nuk dolëm na nxorën me dhunë”.

Kurti ka shtuar se është arrestuar dhe liruar pa asnjë vendim.

“Ju faleminderit shumë për demonstratën për mua, për Zajednicën, për Demarkacionin. Nuk do të ndalemi. Janë mbledhur rreth 200 mijë nënshkrime kundër Zajednicës dhe Demarkacionit. Nuk ka fuqi më të madhe sesa vendosmëria e popullit. Të mbetemi kështu të bashkuar”, është shprehur Kurti para mbështetësve të tij.

Ndërsa Vetëvendosje pas lirimit të Kurtit deklaroi se presioni qytetar e liroi Albin Kurtin, e presioni qytetar do ta ndalë “Zajednicën”.

“Fitorja është e pashmangshme sepse pushteti gjithmonë dorëzohet para vendosmërisë qytetare”, thotë Vetëvendosje. /tesheshi.com/