Kryeministri në detyrë Albin Kurti, e ka vizatuar të mandatuarin nga Thaçi për kryeministër të ri, ish-zëvëndësin e tij nga radhët e LDK-së Abdullah Hoti, si një njeri mjaft të dobët dhe sabotues të qeverisjes së tij, që sipas Kurtit është më e mira e pasluftës.
“Nuk mund të komentoj dëshirat e të gjithë njerëzve për dëshira dhe poste, por për ish-zëvendësin tim që u shkarkua me 25 mars, mund të them se gjatë qeverisjes tonë ka qenë destruktiv dhe thua se e kishte një kovë me zall në krye që t’ua hedhë rrotave të qeverisë më të mirë të pasluftës dhe të na ngadalësojë ecjen tonë”, tha Kurti, duke potencuar faktin se nuk përfshihet as tek njerëzit e votuar.
“As në 10 njerëzit më të votuar nuk është. Pra, nuk bëhet fjalë për demokraci, por për legjitimitet. Bëhet fjalë për dëshirën e presidentit që të ketë një kryeministër tjetër të dobët. Meqë presidenti i Kosovës dëshiron të jetë më shumë se presidentin atij i nevojitet një kryeministër që është më pak se kryeministër”, theksoi njeriu që ende vijon të qeverisë, edhe pse i rrëzuar me mocion mosbesimi.
Duke ia konsideruar nismat e fundit për një qeveri të re me kryeministër të ri, përzgjedhur nga LDK, si anti-kushtetuese, Kurti e ftoi Thaçin që të kandidonte për kryeministër.
“Ai do kryeministër të dobët që ia mbanë isën në intencën për ta shpallë Gjendjen e Jashtëzakonshme. Me mua nuk e bëri dot, prandaj u zmbraps. Shkoi në Uashington u kthye pa marrëveshje. Erdhi këtu në Këshillin e Sigurisë iku pa vendim. Pra, presidenti është zmbraps me këtë Qeveri dhe me të drejtë”, tha Kurti, që, dukealuduar se Thaçi nuk është i kënaqur me kompetencat dhe dëshiron më shumë, deklaroi:.
“Nëse është kështu le të japë dorëheqje dhe të del në zgjedhje. Nëse do më shumë kompetenca le të garon për kryeministër, por jo ta keqpërdorë pozitën e presidentit dhe mandatin kushtetues”. /tesheshi.com/
