Deputeti i VV-së, Albin Kurti ka dhënë detaje për vdekjen e aktivistit të tyre, Astrit Dehari; ndonëse rezultatet e para të autopsisë thonë se Astriti ka vdekur nga asfiksia, pra për shkak të mungesës së ajrit, pa dhënë detaje të tjera.
Por Kurti, vdekjen e tij e cilëson të dhunshme dhe për këtë e bën përgjegjës pushtetin.
“Informatat e fundit që i kemi janë se ai ka përjetuar një vrasje të dhunshme në qelinë e tij, e nuk bëhet fjalë për vetëvrasje. Pas obduksionit, mjekët shkencëtarë, të cilët gjatë tërë kohës e kanë vëzhguar, kanë dhënë konkluzion të përbashkët se shkaktar i vdekjes nuk ka qenë kurrfarë medikamenti, i cili do të mund të thoshte se gjendja e tij psiko-fizike ishte jonormale. Vdekja erdhi nga ngufatja me një mjet të fortë, dhe ky mjet i fortë ishte një shishe e plastikës që është gjetur në fytin e Astritit. Ishte aso shishe e foshnjave, e fortë.Mjekët kanë thënë se nuk kanë hasur kurrë një rast të tillë të vetëvrasjes”, ka deklaruar Kurti, në emisionin Interaktiv të KTV-së.
Ai më tej ka treguar se Astriti ka në trup disa plagë.
“Astriti ka gërvishtje në qafë, në dorë, hemtoma, dhe bri të thyer dhe një plagë në kokë, në ballë. Janë gjetur disa gjësende me gjak. Është gjetur një fije e hollë litari me gjak, brisqe të rrojës të ndara nga makina”, ka treguar Kurti.
Ndryshe, sot do të mbahet një mbledhje komemorative për Astritin si dhe një marsh protestues ku do të kërkohet drejtësi.
Varrimi i të ndjerit do të bëhet sot në ora 14:00. /tesheshi.com/
