Përdorimi i substancës narkotike të llojit heroinë ka shënuar rënie të përdorimit kohët e fundit nga të rinjtë e Kosovës, për dallim nga vendet e tjera të botës, ku thuhet të ketë pasur rritje të përdorimit të saj.
Në tre vitet e fundit nuk është shënuar asnjë rast që të rinjtë të kenë kërkuar ndihmë mjekësore për përdorim të heroinës, ka deklaruar Safet Blakaj, drejtues i Qendrës Mediko-Psikoterapeutike “Labirint” në Prishtinë.
Megjithatë, thotë ai, substancat e tjera narkotike kanë shënuar rritje në përdorim, dhe marihuana tashmë përdoret edhe nga fëmijët e moshës 12-vjeçare.
“Mirëpo, janë rritur përdoruesit e drogave tjera, sidomos marihuana. Mosha mesatare e fillimit të cilësdo drogë është 16 vjeç. Por ka raste kur me marihuanë fillojnë me 12 vjeç, pra, fëmijë, ndonëse janë raste të rralla. Derisa kalojnë me droga tjera në moshën 21-vjeçare,” deklaron Blakaj për radio “Evropa e Lirë”.
Autoritetet e rendit shprehen se për dukurinë e luftimit të trafikimit me narkotikë kanë zhvilluar plane strategjike, të cilat, siç thonë, janë treguar të suksesshme.
Baki Kelani, zyrtar për informim i policisë, thotë se kanë shtuar aktivitetet për parandalimin e trafikimit të narkotikëve.
“Policia e Kosovës, bazuar në planin strategjik zhvillimor, një rëndësi të veçantë i ka kushtuar luftës së trafikimit me narkotikë, ku bën pjesë edhe heroina. Policia ka arritur që brenda kësaj periudhe kohore të vitit 2017 të realizojë një sërë planesh konkrete, ku nga janari deri në prill të konfiskojë mbi 28 kilogramë heroinë. Kjo tregon se rezultatet janë të larta, duke marrë parasysh periudhën e shkurtër dhe sasinë e konfiskuar,” shpjegon Kelani.
Ndryshe, Kosova konsiderohet si vend transit për trafikimin e drogës, dhe jo destinacion i saj; një pohim i bazuar në raportet ndërkombëtare për aktivitetet e grupeve të njohura si trafikuese të substancave narkotike. /tesheshi.com/
