Gjermania shprehu shqetësimin në lidhje me sulmet ajrore në Siri, duke apeluar Moskën të qartësojë objektivat dhe metodat e këtyre operacioneve ushtarake.
“Lajmet e fundit për sulme ajrore ruse nuk reduktojnë shqetësimin për situatën në Siri”, tha ministri i Jashtëm gjerman, Frank-Walter Steinmeier gjatë një konference shtypi në Nju Jork.
Sipas tij, deri më tani nuk ka të dhëna as për objektivat dhe as për metodikën e këtyre sulmeve ajrore. “Eshtë në interesin e Rusisë të sjellë informacion sa më shpejt të jetë e mundur”, tha ai.
Ndërsa, ministri i Jashtëm francez, Jean-Yves Le Drian akuzoi drejtpërdrejt Rusinë se po godet objektiva të opozitës së moderuar siriane.
Duke folur në parlamentin francez, ai tha se forcat ruse goditën Sirinë dhe “habitshëm nuk goditën ISIS”.
Lideri i opozitës siriane me bazë në Turqi, Khaled Khoja tha se 36 civilë kanë humbur jetën nga sulmet ajrore ruse në Homs, në zonë që sipas tij, nuk ka prani të militantëve të ISIS.
Ndërkaq, Steinmeier paralajmëroi se edhe një gabim i vogël gjatë sulmeve ajrore ruse mund të sjellë rreziqe të mëdha.
Konflikti sirian, shtoi ai, nuk mund të zgjidhet me mjete ushtarake dhe apeloi Rusinë të mos minojë përpjekjet e fundit për një zgjidhje politike të konfliktit. /tesheshi.com/
