Akuza Perëndimit nga Çekia: masakrat e së kaluarës koloniale nxisin radikalizimin

Lubomír Zaorálek, kandidati social-demokrat për kryeministër në Republikën Çeke mbajti një fjalim “të errët” siç u cilësua nga media, duket për shkak të deklaratave të pazakonta mes politikanëve të karrierës në Europë. Sipas tij, Perëndimi ka kohë edhe 20 vjet për të arritur një marrëveshje me botën muslimane.

Zaoralek thotë se ndërgjegjësimi në botën muslimane për masakrat e kryera gjatë së kaluarës koloniale nga Perëndimi, po ushqen radikalizimin e sotëm të komuniteteve.

Fjalimi i tij në samitin për Europën e së ardhmes në Pragë, që kapi titujt e medias,  u mbajt në të njëjtën ditë kur partia e tij u mblodh për të zgjedhur se kush do ta drejtojë në zgjedhje. Meqënëse kryeministri aktual jo-popullor pritet të largohet, Zaoralek mund të jetë bashkëdrejtues i fushatës me ministrin e Brendshëm çek.

Përballë sfidës në rritje elektorale nga forcat populiste, social-demokratët që janë në qeverisje, po përgatisin terrenin për t’u përballur me çështjen e emigrantëve që pritet të jetë ndër pikat kyçe të fushatës. Kjo, sidomos pas vendimit të Komisionit të BE-së që thotë se çekët së bashku me Poloninë dhe Hungarinë po shkelin marrëveshjen e Brukselit për të pranuar një kuotë të caktuar refugjatësh.  Zaorálek thotë se ai nuk do të pranojë vendimin e BE-së.

Në fjalimin e tij, Zaorálek tha se kombe si Britania, Franca, Hollanda, Belgjika, Shtetet e Bashkuara, perandoria Ruse dhe pasardhësja e saj sovjetike kanë qenë përgjegjëse për vdekjen e miliona njerëzve.

Ai tha se Perëndimi po përballet me një revolt nga brenda për shkak të pabarazisë së shkaktuar nga globalizmi dhe nga jashtë nga masa të arsimuara njerëzish që ndihen të zemëruara nga fati i tyre dhe e kaluara koloniale.

“Jemi përballë një zgjimi tani. Ne duhet të fokusohemi tek bota jo-perëndimore dhe masat e reja politike në ngjitje”, tha Zaorálek. “Kujtesa politike e shtypur për një kohë të gjatë po nxit një zgjim masiv dhe shpërthyes që merr energji nga ekstremizmi islamist në Lindjen e Mesme”. Ai tha se i njëjti fenomen mund të përhapet në Afrikë dhe në Azi.

Komentet e tij me gjasa do të zemërojnë ata që besojnë se referencat ndaj së kaluarës së Perëndimit mund të përdoren si justifikim i pjesshëm i dhunës ekstremiste.

Zaorálek, duke pranuar se po ngrinte çështje të vështira, vuri në dukje një zemërim të vonuar të nxitur nga “arsimimi dhe horizontet e reja” për masakrat “e krahasueshme me shkallën e krimeve të luftës së nazistëve”.

“Ka një tendencë të madhe për të harruar shumë gjëra në historinë tonë”, tha Zaorálek. “Në Indi, nga gjysma e dytë e shekullit të 19-të, britanikët dyshohet se kanë vrarë deri në 1 milion civilë në shenjë hakmarrjeje ndaj kryengritjes së vitit 1857. Kompania britanike e Indisë Lindore e përdori bujqësinë indiane për të kultivuar opium dhe më pas, në thelb, e çoi atë në Kinë me rezultatin e miliona vdekjeve të parakohshme”.

Ai vijoi: “Në Kongo, 10 apo 15 milionë u vranë nga fundi i shekullit të 19-të dhe fillimit të shekullit të 20-të. Në Vietnam, vlerësime të fundit sugjerojnë se janë vrarë 1 deri në 3 milionë civilë midis viteve 1952 dhe 1975.

“Në botën muslimane, në Kaukazin rus në vitet 1864-67, 90 për qind e popullsisë lokale u detyruan të konvertoheshin dhe midis 300 mijëve deri në 1.5 milion njerëz ose vdiqën nga uria ose u vranë. Në Indonezi, në shekullin e 19-të, pushtuesit hollandezë vranë rreth 300 mijë civilë”.

Ai tha se gjatë luftës algjeriane të viteve 1950, Franca dhunoi 1.5 milion njerëz, gati gjysmën e popullsisë. Në Libinë fqinje, tha ai, vlerësohet se vdiqën gjysëm milioni njerëz midis viteve 1927 dhe 1935, pjesërisht për shkak të kampeve italiane të pëqëndrimit.

Ai shtoi se një milion civilë vdiqën në Afganistan gjatë pushtimit sovjetik. Edhe 600 mijë të tjerë u vranë në luftën civile të Irakut në duart e Shteteve të Bashkuara dhe aleatëve të saj, në 13 vjetët e fundit.

Zaorálek tha se “po aq tronditëse sa edhe shkalla e këtyre masakrave është shpejtësia me të cilën Perëndimi i harron ato”, duke shtuar se është e nevojshme të sillen në kujtesë këto shifra “kur perëndimi dëshiron të flasë për radikalizimin dhe sesi është e mundshme të përballemi me kaq shumë urrejtje dhe dhunë”.

Përgjigja e vetme qëndron në përpjekjet e vazhdueshme për të bashkëpunuar me vendet muslimane, tha ai, duke shtuar se 20 vjetët në vijim përfaqësojnë “shansin e fundit për rreshtimet më tradicionale me të cilat kemi siguri”.

Për pjesën e mbetur të shekullit, shtoi ai, Perëndimi do të përballet me një betejë për mbijetesë kryesisht për shkak të sfidës nga ndryshimet klimaterike.

Përgatiti: Juli Prifti – /tesheshi.com/