Autoriteti Kombëtar i Ushqimit bëri të ditur se 377 subjekte në zonat turistike, mes të cilave markete, restorante, “fast food” dhe pastiçeri kanë rezultuar jashtë kushteve higjieno-sanitare.
AKU në periudhën qershor-gusht ka kryer rreth 1300 inspektime në Shkodër, Lezhë, Durrës, Fier, Vlorë dhe Korçë, që rezultojnë edhe qarqet me numrin më të lartë të vizitorëve dhe turistëve.
Autoriteti thotë se ka paralajmëruar 377 operatorë për plotësimin e kushteve higjieno-sanitare, kryerjen e analizës së ujit, pajisjen me libreza shëndetësore të personelit dhe hartimin e planit të masave kundër dëmtuesve, brejtësve dhe insekteve.
Të paktën 7 biznese në zonën e Vlorës nuk kanë korrigjuar parregullsitë brenda afatit dhe ndaj tyre AKU ka marrë masën e ndëshkimit me gjobë në vlerën e 950 mijë lekëve.
AKU thotë se në dhjetra raste ka analizuar kampionët e vajit për skuqje në restorante dhe në “fast food”, por vlerat kanë rezultuar brenda standardeve.
Po kështu, janë marrë mostra të produkteve në pastiçeri dhe restorante për kryerjen e analizave mikrobiologjike.
Disa prej tyre kanë rezultuar brenda standardeve, ndërsa për të tjerat pritet rezultati nga laboratorët. /tesheshi.com/
