Nga Shkëlzen Rrecaj
Muaji Ramazan në kalendarin e muslimanëve ka një rëndësi jashtëzakonisht të madhe, për faktin se gjatë këtij muaji realizohet njëri prej pesë kushteve të Islamit, agjërimi në këtë muaj. Kaluan kohët kur besimtarët muslimanë shqiptarë pothuajse në të gjitha trevat ku jetojnë, persekutoheshin e dhunoheshin nëse kuptoheshin se ishin agjërueshëm.
Tani agjërimi më nuk është tabu e aq më pak i ndaluar. Agjërues gjen në të gjitha shtresat e shoqërisë sonë dhe te të gjitha profesionet. Për ta nuk ka kurrfarë vështirësie për të kaluar deri në 16 orë pa ngrënë e pa pirë. Mjafton të besosh dhe ky besim të dhuron energji e pse jo edhe kënaqësi. Të shumtë janë edhe artistët që agjërojnë këtë muaj.
Agjërues ‘me përvojë’ është edhe aktori i njohur prizrenas i teatrit dhe filmit Shkëlzen Veseli. “Ferma e kafshëve”, “Lufta në kohën e dashurisë, “Një varr për majorin e mbretit”, “Nata e dymbëdhjetë”, “39 shkallet” janë vetëm disa nga shfaqjet e shumta të tij, por ajo që i dha famën gjithandej ku flitet shqip është roli i profesorit të muzikës në serialin “O sa mirë”. Por skena nuk është arsyeja e bisedës sonë me të. Për këtë mbase do të flasim herëve të tjera. Shkëlzeni, përveç si aktor, në shoqëri njihet si besimtar i devotshëm. Tani që jemi në fund të muajit Ramazan zgjodhëm Xenin për t’na rrëfyer rëndësinë që ka agjërimi në jetën e tij, vështirësitë dhe sakrificën që e ka një besimtar i angazhuar në projekte të shumta si dhe kënaqësinë të cilën ai e gjen në këtë muaj.
Për të ky është Ramazani i dhjetë që agjëron dhe ndihet shumë i lumtur që Zoti ia ka dhënë një mundësi të tillë. “Fakti që Allahu i Madhërishëm agjërimin e ka vendosur në mesin e pesë shtyllave të fesë sonë tregon se kemi të bëjmë me një adhurim që ka shumë peshë te Krijuesi ynë, si dhe duke iu referuar ajetit kur`anor se Zoti e ka bërë agjërimin obligim në mënyrë që “që të bëheni të devotshëm”, atëherë e kemi qëllimin e pastër, pra që të bëhemi të devotshëm, dhashtë Zoti”, shprehet ai.
Sa i përket ndjesisë shpirtërore Shkëlzeni thotë se: “Ky muaj sikur i kujton njeriut se duhet t’i japë prioritet elementit shpirtëror, për dallim nga muajt e tjerë kur nuk kemi kufizime në oraret e të ushqyerit. Pikërisht në këtë muaj janë ato ndalesa, pra duke u larguar nga kërkesat fizike, prej agimit në mbrëmje, ne vendosim faktorin shpirtëror në rend të parë dhe unë këtë muaj e ndjej jashtëzakonisht shumë.”
Të shumtë ishin ata që e paragjykuan agjërimin e sivjetmë, pasi që filloi pikërisht në kohën kur nisi stina e verës. Por Zoti e bëri të freskët, madje ata që agjëruan në kor i dëgjojmë duke thënë se më të lehtë as që e kishin pritur. Përshtypje të njëjtë ka edhe Shkëlzeni dhe për këtë e falënderon Zotin: “Shyqyr Zotit ky muaj nuk u veçua me temperatura të larta, kështu që po e kemi më të lehtë agjërimin, po edhe sikur të ishte nxehtë unë e pata ndarë mendjen të agjëroj dhe aspak nuk isha i demotivuar”.
Edhe përkundër angazhimeve në teatër dhe televizion ai është shumë i përkushtuar në këtyre netëve të fundit të Ramazanit: “Asnjëherë nuk mendoj se mjafton kur është në pyetje adhurimi ndaj Krijuesit, por është e vërtetë që përveç angazhimeve që kam po arrij ta rris aktivitetin e namazeve dhe lutjeve në këtë muaj”, shprehet Shkëlzeni.
Ky muaj po ikën shpejt, ashtu siç ikën shpejt edhe vetë jeta. Ramazani ishte një mundësi e mirë për të gjithë ata që dëshirojnë të jenë më të devotshëm, më të mirë me veten e tyre, me njerëzit dhe me Zotin. Në fakt, kjo është ajo për çfarë kemi më së shumti sot nevojë, qoftë si individë, qoftë si shoqëri./tesheshi.com/
