Nga Shkëlzen Rrecaj
Pas bllokimit të Kuvendit nga opozita, deputetët e saj kanë qenë të zhurmshëm, kanë përdorur filikaça, si dhe në fund kanë hedhur gaz lotsjellës në sallë.
Në lidhje me këto veprime kanë reaguar presidentja Atifete Jahjaga, kryeministri Isa Mustafa, si dhe figura të publicistikës.
Në reagimin e presidentes thuhet: “Veprimet e deputetëve të opozitës janë të shëmtuara dhe në kundërshtim me praktikën demokratike dhe sjelljen institucionale të cilën po mëtojmë ta ndërtojmë.”
Ajo i ka ftuar deputetët e Kuvendit të Kosovës të distancohen nga dhuna, të respektojnë institucionet që janë ndërtuar me shumë mund dhe sakrificë, përfshirë sakrificën e tyre personale. Në pikëpamjen e saj, mospajtimet konceptuale dhe politike duhet të diskutohen me forcën e argumentit dhe të kulturës parlamentare.
Presidentja Jahjaga ka theksuar se qytetarët kosovarë presin nga të zgjedhurit e tyre, si në pozitë dhe në opozitë, që t’i çojnë përpara proceset e konsolidimit të Republikës së Kosovës, e jo të shndërrohen në spektatorë të tensioneve, krizave dhe bllokadave të vazhdueshme që pengojnë përparimin e vendit dhe rrezikojnë mirëqenien e qytetarit.
Veçmas ka reaguar edhe qeveria e Kosovës, e cila shpreh keqardhje për dhunën e ushtruar sot nga një grup i deputetëve të opozitës në seancën e Kuvendit e Kosovës, ku për pasojë disa deputetë morën lëndime dhe kërkuan ndihmë mjekësore.
“Përkundër kushteve ekstreme të krijuara nga dhuna e manifestuar nga ky grup i deputetëve opozitarë, falë vendosmërisë dhe përkushtimit demokratik të shumicës parlamentare, sot në Kuvend u miratuan disa projektligje me rëndësi për jetën e qytetarëve, të propozuara nga Qeveria e Kosovës,” theksohet në reagimin e qeverisë.
Po ashtu, qeveria u ka bërë thirrje deputetëve opozitarë, të cilët sot u treguan të dhunshëm, duke tejkaluar çdo kufi të sjelljes institucionale dhe demokratike. Ajo u ka kërkuar atyre që t’i japin fund dhunës dhe çfarëdo veprimi në kundërshtim me interesat vitale të qytetarëve, të shtetit, si dhe të partneritetit të çmuar të Republikës së Kosovës me SHBA-të dhe vendet e BE-së.
“Qeveria e Republikës së Kosovës, përkundër këtyre rrethanave, mbetet e përkushtuar për t’i përmbushur obligimet e saj ligjore dhe kushtetuese, si dhe për të qenë pjesë aktive e çdo debati parlamentar i cili do t’i kontribuonte zhvillimit ekonomik, shtetit ligjor dhe proceseve integruese euroatlantike të vendit,” thuhet në reagimin e qeverisë për mediat.
Njohësi i çështjeve politike Lumir Abdixhiku i ka komentuar veprimet e fundit të opozitës në Kuvend gjatë ditës së sotme përmes një postimi në Facebook.
Ai ka shkruar se opozita ka humbur shumë vota me këto veprime. Madje ka shkuar më tej, duke e cilësuar këtë si fatkeqësinë më të madhe të vendit.
“Kur këshillohesh e ndikohesh nga axhami e revolucionarë pa përgjegjësi, prodhon ngjarje tragjiko-komike si këto. I kënaq një grusht militantësh në zyrë e Facebook; i humbet mijëra qytetarë votues që sot kërkojnë shpresë. Natyrisht se nuk ndryshon asgjë. Zgjat vetëm kohën e uzurpuesve. Fatkeqësia më e madhe e këtij vendi është se nuk ka më alternativë. Shnosh qofshim,” ka shkruar Abdixhiku në Facebook.
Aktet e opozitës në Kuvend i ka komentuar edhe gazetari Milaim Zeka në profilin e tij po në Facebook. Sipas tij, opozita sot u bë horë para të gjithë shqiptarëve. Më pas ka ironizuar me opozitën, me ç’rast ka thënë se pas filikaçave, ata e kanë radhën t’u bien surleve tash.
Ndërsa publicisti Astrit Gashi e ka çmuar gjithçka që ka ndodhur si “vetëshkatërrim” të Lëvizjes Vetëvendosje, pasi, sipas tij, “skenari ishte i tyre”.
Ai po ashtu ka treguar edhe destinacionin e VV-së nëse vazhdon kështu siç e ka nisur. “Ajo po shkon e sigurt dhe me dëshirë drejt të qenit parti e skutave,” ka deklaruar ai në një postim në Facebook. /tesheshi.com/
