Mund të konsiderohet fat i madh fakti që nga rrëzimi i një autobusi mëngjesin e sotëm në aksin Gjirokastër – Tepelenë, nuk ka asnjë viktimë.
Ndonëse janë afro 30 të plagosur apo të lënduar, aq sa pasagjerë kishte dhe autobusi, të cilët kanë përfunduar për trajtim mjekësor në spitalin e Gjirokastrës.
Burime nga ky spital thonë se askush prej tyre nuk rrezikon jetën.
Autobusi që u aksidentua ishte nisur nga Athina drejt Tiranës. Për momentin, mendohet se shkak i rrëzimit mund të kenë qenë lagështia në rrugë.
Koha kur ka ndodhur aksidenti ka qenë mëngjesi i hershëm, pothuajse në errësirë, ndërsa pasagjerët thanë se kanë qenë në gjumë kur e kanë parë vetën njëri mbi tjetrin nga batimi.
Fillimisht, autobusi është përplasur me faqen e kodrës në anën e shoferit dhe më pas ka humbur kontrollin. Pasagjerët thanë gjithashtu se ardhja e autoambulancave dhe e policisë ka qenë e shpejtë dhe se ndihma po ashtu iu është dhënë në kohë.
Gjithsesi, fat i madh që në këtë aksident nuk është shënuar asnjë i vdekur. /tesheshi.com/
