Kryetari i Mitrovicës, Agim Bahtiri, njëherësh nënkryetar i AKR-së, ka bërë të ditur se kjo parti vendosi mbrëmjen e djeshme të mos bëjë koalicion me PAN-in, duke e bërë edhe më të mjergullt situatën politike para seancës së 24 gushtit.
“Ju informoj se AKR-ja mbrëmë ka marrë vendin që mos të bëjë koalicion me PAN-in”, ka shkruar Bahtiri në Facebook.
Ky deklarim i ri i AKR sigurisht do të vërë ë lëvizje Ramush Haradinajn, i cili së fundmi e ka konsideruar fakt të kryer bashkëqeverisjen me AKR-në.
Bahtiri, gjithashtu ka mohuar raportimet se ai nuk do të kandidojë për kryetar të Mitrovicës duke theksuar se pret fitore të pakontestueshme.
“Dje mediat kishin shkruar se unë nuk do të rikandidoj për kryetar të Mitrovicës, por isha në ceremoninë e varrimit të Bajram Rexhepit dhe e kisha të mbyllur telefonin, duke mos pasur mundësi t’i përgjigjem mediave dhe qytetarëve, për shqetësimet e të cilëve më vjen jashtëzakonisht keq”, ka thënë Bahtiri.
“I garantoj qytetarët e Mitrovicës se do të jem çdo herë me ta dhe do të punoj për ta. Pra, unë do të rikandidoj prapë për kryetar të Mitrovicës, ku fitorja do të jetë e pakontestueshme, duke pasur parasysh punët që kemi bërë së bashku me qytetarët dhe ekipin më të cilin i hyj kësaj gare.
Pjesë e ekipit tim do të jenë njerëzit më të devotshëm që vijnë nga gjiri i popullit, ku sot do të prezantoj listën me 38 kandidatët e AKR-së për asamblenë komunale, të cilët janë njerëzit me të denjë të Mitrovicës, për të mbrojtur interesat e qytetarëve”, ka shkruar Bahtiri. /tesheshi.com/
