Akciza e re për karburantet, AAK: vendim skandaloz, qeveria po mbulon humbjet në buxhet

Aleanca për Ardhmërinë e Kosovës ka reaguar pas vendimit të qeverisë për vendosjen e normës së akcizës për “gazet e naftës dhe hidrokarbure të tjera gazotike” në vlerën prej 0,15 euro/litër,  që nënkupton ngritje të normës se akcizës me 50 për qind.
Sipas AAK-së, kjo rritje nuk është e parashikuar në buxhetin e Kosovës për vitin 2015, e kjo tregon se qeveria ka dështuar plotësisht edhe në planin ekonomik, edhe buxhetor dhe tani merr vendime të paparashikuara e të cilat e dëmtojnë rëndë qytetarin dhe bizneset në Kosovë.
“Qeveria e Kosovës e cila i ka rritur shpenzimet e veta për t’i kënaqur ambiciet politike të aparatçikëve partiakë, në masë te paparë deri më tani, po vazhdon ta ngarkojë jetën ekonomike dhe sociale në Kosovë,” thuhet në reagimin e AAK-së.
Po ashtu, kjo parti deklaron se e gjithë kjo rritje bëhet në kurriz të qytetarëve dhe biznesit me qëllim të mbulimit të humbjeve buxhetore që po bëhen për shkak të keqqeverisjes dhe abuzimit me paranë publike. “Ky vendim është skandaloz, dhe duhet të revokohet sa më parë”, thekson AAK. /tesheshi.com/