Bashkimi Demokratik për Integrim sot ka hedhur poshtë lajmet e disa medieve vendore, të cilat duke u thirrur në gazetën austriake “Standard” raportuan se për një periudhë të shkurtë kohore, Ali Ahmeti pritet që të zëvendësohet nga kreu më i lartë i partisë.
Sipas zëdhënësit të BDI-së, Bujar Osmani, Ali Ahmeti është njëri ndër tre emblemat e historisë më të ndritshme shqiptare, së bashku me UÇK-në dhe partinë e tij, andaj mbeten të pazëvedësueshëm.
“UÇK, Ali Ahmeti dhe BDI janë tre emblemat e historisë më të ndritshme shqiptare. Janë indi lidhës i vlerave më patriotike dhe progresive të kohës sonë dhe nuk ka kush mundet t’i zëvendëson këto emblema,” ka shkruar zëdhënësi i BDI-së, Bujar Osmani në facebook.
Lajmi se Ali Ahmeti do të ndërrohet nga posti i kryetarit të BDI-së, sipas gazetës Dojçe Vele e kanë konfirmuar edhe burime partiake të cilat kanë thënë se gjatë krizës nëpër të cilën po kalon Maqedonia, Ahmeti nuk ka treguar aftësi lideri, por është treguar tejet i influencuar herë nga Gruevski, e herë nga Zaevi. Me këtë thonë burimet partiake, Ahmeti nuk ka ofruar ndihmën e nevojshme për bashkësinë ndërkombëtare për dalje nga kriza, ndihmë që ata e kanë pritur nga kryetari i partisë më të madhe shqiptare.
Në këtë situatë, aftësi më të mëdha lidershipi ka treguar nënkryetarja e partisë, Teuta Arifi, e cila në bashkëpunim me bashkësinë ndërkombëtare ka filluar të ndryshojë kursin “pro-vmroist” të partisë.
Njëkohësisht gazeta “Standard” ka shkruar se edhe brenda VMRO-DPMNE-së janë paraqitur pakënaqësi kundër kryetarit të kësaj partie, Nikolla Gruevski.
Mirëpo deri tani nga VMRO nuk kanë dalë në ndonjë qëndrim që të demantojnë ose pranojnë informacionet se kreu i tyre mund të zëvendësohet me ndonjërin nga anëtarët tjerë të partisë./tesheshi.com/
