Ahmed Demir, pronari i një restoranti turk në qytetin Altena të Gjermanisë, rrëfen ngjarjen e ndodhur në lokalin e tij ku dikush ka goditur me thikë kryebashkiakun e qytetit.
Emigranti nga Turqia i tregoi të përditshmes italiane La Repubblica, ngjarjen e rëndë kur një person me probleme, militant i së djathtës anti-emigrantë tentoi të vrasë politikanin e lartë të qytetit të vogël të landit të NorthVesfalisë.
“Andreas Hollstein, kryebashkiaku i Altenas po hante darkën e zakonshme në restorantin tim, përkatësisht pjatën e tij të preferuar kebab me patate të skuqura. Në atë moment, një person i dehur futet në lokal, porosit një kebab dhe nis të bërtasë fort. Më pas nxjerr thikën e tij dhe ja vendos në qafë kryebashkiakut, i cili me reflekse të mira largohet, por thika i preku damarin kryesor dhe lokali u mbush me gjak. Bërtiste sa kishte fuqi se kryebashkiaku e mbushi qytetin me emigrant, ndaj duhet të vdiste duke e lënë pa pirë ujë deri sa të jepte shpirt. Unë e kapa nga prapa dhe e largova. Por ishte shumë i fortë s’mbahej, Aty ndërhyri babai im Abdullai që e çarmatosi duke i kapur kyçin. Nëna ime thirri policinë ndërkohë, e cila më pas e arrestoi”.
Ahmeti dhe familja e tij, duke folur për La Repubblica thekson se nuk mund ta kuptojnë dot se si një njeri i mirë dhe paqësor që ka bërë aq shumë gjëra të mira për qytetin, duhet të vritet.
Ahmet Demir është 27 vjeç dhe jeton në Altena që kur ishte 2 vjeç, kur Abdullai, i ati erdhi nga Turqia.
“Nuk po e kuptoj më këtë vend”, thotë ai dhe shton: “Po goditen më të mirët”. /tesheshi.com/
