Ende nuk dihet nëse do të ketë marrëveshje politike mes palëve që mund të rezultojë me pjesëmarrjen e Opozitës në zgjedhje, mirëpo duket se aleatët e Bashës po lënë të kuptohet se palët janë drejt gjetjes së dakordësisë për shtyrjen e datës së zgjedhjeve.
Në mbledhjen e asamblesë së partisë Agrare Ambjentaliste, kreu i saj, Agron Duka foli me tone optimiste për marrëveshje mes palëve.
“U mor në shqyrtim paketa MecAllister dhe propozimet e bëra nga kryeministri Rama siç ishte zv/kryeministri etj. e cila kërkon një kohë të domosdoshme implementimi. Unë kam ngulur këmbë dhe besoj u ra dakord që votimi elektronik e ka humbur sensin pasi ndërkohë është caktuar një datë zgjedhjesh dhe kërkohet një shtyrje e logjikshme sigurisht që nuk mund të kërkojmë një vit. E rëndësishme është se duket sikur po shkon drejt realizimit”, tha Duka.
Duka tha se beson se do të ketë një datë që të jetë optimale për opozitën. “Por sidoqoftë kjo datë a është pas dy muajsh apo pas 6 muajsh e rëndësishme është që ne na gjen të bashkuar dhe në krah të njëri-tjetrit. Unë gjykoj sipas mendjes time që jo vetëm në politike, por në biznes, jetë dhe kudo po deshe të dështosh shiheni njëri-tjetrin me dyshim, po deshe të ecësh përpara shiheni njëri-tjetrin me respekt, nuk dua ta huazoj atë fjalën e Metës, por e them sinqerisht me dashuri”, tha Duka. /tesheshi.com/
