Nga Blendi Gashi
Në Mushtisht të Suharekës, banorët lokalë më 28 gusht protesuan kundër ardhjes së serbëve të zhvendosur nga ky fshat që nga paslufta, për çka erdhi deri te eskalimi i situatës mes policisë dhe fshatarëve.
Tre javë më pas kjo çështje është bërë edhe temë debati në Kuvendin e Kosovës.
Në seacën e sotme plenare, duke u munduar të bëj rolin e viktimës, kryetari i Listës Serbe, Slavko Simiç, ka reaguar ndaj moslejimit të serbëve të zhvendosur ta vizitojnë Mushtishtin, fshatin ku ka jetuar para lufte. Por ai nuk e tha asnjë fjalë për arsyen pse serbët u penguan ta vizitojnë dikur ish fshatin ku jetuan.
Simiq, sigurisht se nuk përmendi krimet që serbët lokalë kanë kryer ndaj banorëve shqiptarë të Mushtishtit gjatë luftës, e konkretisht vrasjen e 17 shqiptarëve, ku eshtrat e disa prej tyre ende nuk janë kthyer për t’i varrosur.
Pra, shtrohet pyetja se për ç’farë të shkelje të drejtave të njeriut po flet kreu i Listës Serbe, Slavko Simiç?
Sigurisht, fjalimi i tij sot në kuvend, për të folur kinse për padrejtësitë që iu bën serbëve të zhvendosur të Mushtishtit, është një provokim i rëndë sidomos për famijet shqiptare të fshatit në fjalë, familjarët e të cilëve janë vrarë po nga serbët e Mushtishtit të cilët Simiq mundohet t’i bëj viktima.
Deputetja e AAK-së e vetmja që i reagon kreut të Listës Serbe
Ndaj fjalës së Simiçit, erdhi veç një reagim nga deputetët shqiptarë, e sigurisht që do të duhej të reagonin më shumë ligjvënës, sidomos ata që vijnë nga rajoni i Prizrenit, që t’ia bëjnë të qartë Simiqit, që viktima janë shqiptarët që u vranë e u masakruan e jo serbët e Mushtishtit.
Teuta Haxhiu, deputetja e AAK-së është vetmja që i reagoi Simiqit duke i thënë që të mos paraqiten viktimë dhe të kërkojnë privilegje, në vend që të kërkojnë falje.
Ajo tha se shumë krime kanë ndodhur në Kosovë, e për të cilat nuk kanë dhënë askush llogari, ndërkaq vazhdojnë privilegjet e pafundme për serbët në Kosovë.
Deputetja e AAK-së ka thënë se dhjetra familje në Mushtisht kanë humbur të dashurit e tyre, poashtu edhe në Gjakovë, dhe as nuk janë dënuar kriminelët e as nuk është kërkuar falje nga Serbia për krimet e kryera në Kosovë.
“Ju jeni duke kërkuar shumë privilegje, po asnjëherë nuk e keni ngritur zërin si deputetë dhe të kërkoni që të dënohet kriminelet të cilët kanë kryer krime në Kosovë. Mjaft më me privilegje për juve”, ka thënë Haxhiu, ndërsa i ka përmendur Simiçit se shqiptarët edhe pas 17 viteve nuk mund të khehen në pronat e tyre në veri të Mitrovicës.
Se Mushtishti nuk mund t’i falë krimet e kryera në këtë fshat, ka thënë ditë më parë në një intervistë dhënë për tesheshi.com edhe kryetari i këtij fshati, Shaqir Mala.
Ai ka thënë se bashkëfshatarët e tij nuk mund t’i falin krimet që kanë kryer serbët në fshatin e tij, pasi të përfshirë në krime kanë qenë edhe serbët lokal që kanë jetuar në Mushtisht.
“Prona është e shenjtë dhe e garantuar me ligje të Republikës së Kosovës, ashtu siç është e garantuar liria e lëvizjes, por banorët e Mushtishtit nuk janë të gatshëm të falin të kaluarën, pasi në Serbi ende ka trupa të pakthyer të banorëve që janë vrarë gjatë luftës në Mushtisht”, ka thënë ditë më parë Mala. /tesheshi.com/
